Homber a kere cu su ex ta su propiedad
ORANJESTAD.(AAN):Diaranzon marduga 1’or, central di polis a dirigi patruya di Noord den Christianstraat pa atende e asistencia solicita pa un persona indesea. Na e direccion polis a papia cu e señora di inicialnan L.P. di 21 aña cu a conta cu e homber di inicialnan J.P. constantemente ta molesti’e y canse. E tal J.P. segun denunciante L.P. a presenta den un auto color shinishi y el a baha drenta cura y via bentana el a busca contacto cune. E motibo cu J.P. ta hasi fastioso, ta debi cu mas cu un luna pasa cos entre nan dos a caba.
E homber J.P., segun e señora, a laga sa cu L.P. ta su propiedad. Durante cu polis tabata atende L.P., a drenta un yamada riba celular di e señora y a resulta cu ta J.P. ta yamando.
Polis a contesta e yamada cu permiso di e señora y enberdad tabata trata aki di e homber J.P. y mesora agente a atende debidamente riba su comportacion y e consecuencia di sigui molestia e denunciante. J.P. a compronde e mensahe y a priminti di laga L.P. cu tranquilidad.
