Homber bao di substancia a drenta mondi sconde curpa
ORANJESTAD.(AAN); — Marduga diadomingo a drenta informe na central di polis cu un homber posiblemente bao di presion of pa un of otro problema a core drenta mondi. E informe a yega na oido di central di polis pa tres’or di marduga. Mesora a despacha patruya di Santa Cruz na un cas situa na Paradera. Asina cu polis a presenta habitante nan a indica polis e direccion cu e homber a core drenta mondi na careda. Pa un of otro motibo e homber a drenta mondi na careda y ta sconde su curpa pa e no wordo descubri.
Polis despues di a scucha e version a dicidi tambe pa drenta rondea den e mondi y un rato despues e homber a wordo haya.
Polis a purba na prome instancia di convence e homber pa sali for di e mondi y el a scucha.
E homber a wordo observa pa polis y a keda constata cu e tabata bao influencia di substancia.
Pa su seguridad polis a dicidi di detene y a transporte pa warda ya cu e tabata papia yen di cos bruha.
Na warda di Santa Cruz, comandante a pidi presencia di ambulans pa motibo a keda observa tambe cu e no ta 100 porciento pa no a tuma ningun riesgo. Paramediconan a transporta e homber pa Dr. Horacio Oduber Hospital y pa asina e ricibi atencion medico.
