Diario Online

Homber di edad halto a pone boca na parti intimo di mucha di 5 aña

Publication: Saturday, 28 August 2010. Categoria: Judicial

A scucha exigencia di 15 luna cera
ORANJESTAD(AAN): Diabierna un persona cu nomber F. a presenta dilanti di huez, debi na e hecho cu el a wordo acusa di a uza violencia of menaza y a comete actonan inmoral cu un mucha muher di 5 aña, riba 4 di Mei 2010. Huez for di comienzo a pidi e dos medionan di prensa presente, pa no pone mucho detaye den e relato, for di cual hende por saca afo ta ken ta e personanan. Esaki como proteccion pa e mucha. Pues DIARIO den e relato aki lo laga algun detaye afo, pa tene su mes na loke huez a pidi.
Huez a splica cu e caso a bin dilanti ora cu polis a wordo manda pa Centro Medico, pa bay cerca un mucha riba cual abuso sexual lo a wordo cometi. Mama di e mucha muher a declara na polis cu e tabata cu su yiu na cas di F., kende na varios occasion tabata wak pa e mucha.

El a splica cu despues cu nan a come hunto, el a bay s cas un rato pa busca un DVD.
E mucha e keda cerca e homber. Ora cu el a yega bek, el a drenta camber di e homber y a wak su yiu drumi riba lomba riba e cama cu su Carson di abao baha y e homber tabata tin su boca na e parti intimo di e mucha.

E mama a grita e homber y a puntre kico e ta hasiendo. El a trece e mucha na Centro Medico y docter a hasi un examinacion di e mucha y a constata cu tin indicacion cu un persona lo a mishi frecuentemente na parti intimo di e mucha.

E mucha a comunica na docter y polis tambe cu e homber lo tabata mishi cune na su parti intimo.
Den corte huez a puntra e acusado si e ta keda para riba su declaracion cerca polis y el a bisa cu si.

Sinembargo den corte e homber a cuminza conta hopi cos cu no ta cuadra en absoluto cu loke el a declara cerca polis. El a cuminza conta yen storia rond di e caso, sin papia di e hecho mes cu e lo a comete.

Na dado momento el a splica cu e tabata hunga cu e mucha y el a hasi como si fuera e tabata bay morde e mucha na su barica. El a bisa cu ta na e momento ey e mama a drenta wak loke el a wak y a pensa cu e tabata hasi otro cos.

E acusado a bisa cu nunca el a mishi cu e mucha. Mama di e mucha muher a bisa den corte cu e no tin motibo pa gaña riba e homber. El a bisa cu e no ta gana nada door di acusa e persona incorectamente.

E mama a entrega un demanda cerca huez pa un tratamento cu e yiu tabata ricibi na un specialista. E demanda tabata di 1800 florin.

Fiscal a bisa cu e ta haya e acusacion comproba y a exigi un castigo di 18 luna. Pa loke ta e demanda, fiscal a indica cu e mucha tabata bayendo cerca e specialista caba for di hopi prome cu e caso, pues e no ta haya cu por comproba cu loke a sosode a pone cu e mucha a haya su mes obliga di sigui cu e tratamento.

Huez na final tambe a haya cu e demanda no por a wordo honra. Huez a haya si cu e homber tabata culpable. Huez den su veredicto a tene cuenta si cu e edad halto di e acusado y su salud fisico.

Tambe huez a tene cuenta cu e hecho cu e homber nunca antes a haya su mes den problema cu husticia pa algo semehante. Huez a dicidi di dune e homber 15 luna di castigo incondicional.