Huez a declara Carl Giel su caso contra Gobernador, no admisible
ORANJESTAD(AAN): Diaranzon e decision di huez pa loke ta e demanda di ex director interino di Departamento di Labor Carl Giel, kende a haya su retiro a base di un carta di gobernador. Giel a perde e caso contra Gobernador y DIARIO a tuma contacto cu Minister di Labor Otmar Oduber, pa haya su reaccion riba esaki. Segun Minister Oduber, Giel a wordo kita for di trabao pa motibo cu tabata tin un serie di acusacion hopi serio contra dje, di actonan ilicito cu el a comete.
Tabata dia 13 di Juli cu Giel a haya un ‘landsbesluit’ den cual el a wordo notifica cu el a wordo retira di su funcion.
Giel den e caso a pidi huez pa kita e landsbesluit aki, pero huez a declara Giel no admisible den su peticion y e mes mester a paga e gastonan di e caso. DPO a duna orden pa para salario di Giel for di 13 di Juli, pero ya caba prome cu e caso a bin dilanti, segun Oduber el a ripara cu DPO a comete un fayo, pues a duna e orden pa sigui paga su salario, te cu e papeleo y e caso keda cla por completo, pa e wordo retira.
Oduber a bisa cu ta fastioso pa papia specificamente di e caso, pasobra ta trata di miembro di un partido di oposicion. El a bisa tambe cu tabata tin hopi acusacion den su direccion pa cual a cuminza un investigacion y na dos occasion a prohibi Giel di por drenta Departamento di Labor.
A haya un serie di prueba caminda a ripara claramente cu tabata tin transaccionnan cu no ta normal y ta daña nomber di un bon Gobierno den e departamento.
Segun Oduber, hasta coleganan den su departamento a mustra cu nan no tabata di acuerdo cu su forma di proceder y na hopi occasion Giel lo tabata bisa cu e tabata hasie den nomber di Minister anterior esta Ramon Lee.
“Despues ora nos a hasi investigacion durante e 8 simannan ey cu a pasa, a bin resulta cu por ehempel tabata tin un cantidad di peticion cu tabata negativo pa hendenan no drenta Aruba, incluyendo hopi Chines y Hindu, cu unilateralmente tabata wordo cambia, caminda cu tabata duna conseho positivo y e personanan tabata haya nan permiso na Dimas. Esaki ta djis un parti di loke el a wordo acusa di dje. Giel a wordo acusa tambe di falsificacion etc.
