Huez no ta kita beslag poni roba cuenta di Frederick Croes di FAC–Inst-Elektra
ORANJESTAD(AAN): Recientemente huez a duna su veredicto den un caso cu Frederick Croes a entama contra Fundacion Lotto pa Deporte. Croes ta propietario di e compania Fac-Inst-Elektra, cu a hasi diferente trabao pa Lotto pa Deporte y Lotto a pone beslag riba su cuenta di CMB, pa motibo cu e fundacion ta haya cu Croes a cobra mucho mas di loke e trabaonan tabata bal.
Esaki Lotto a constata, despues di un investigacion hasi pa e oficina di Ingeniero IV-Caribbean.
Mirando esaki, Lotto a pone un beslag di 1.180.633,86 florin riba cuenta di Croes.
Croes no tabata di acuerdo cu esaki y a cuminza e caso pa nan kita e beslag y pa Fundacion Lotto Pa Deporte page un voorschot di 333 mil florin pa e trabaonan di coriente cu el a hasi pa e fundacion.
Lotto su ponencia ta cu Croes a probecha di e hecho cu e tabata sa cu e lo haya e trabaonan y a hasi pues mal uso di e confianza di e fundacion, cobrando sumanan hopi mas halto di loke mester a wordo cobra.
Despues di e studia e caso, huez a yega na e conclusion cu e ta rechaza peticion di Croes.
El a pone si den su veredicto cu den un asina yama ‘Bodem Procedure’, cu ta un caso cu ta mas grandi y ta dura mas largo cu un caso sumario, lo mester determina si enberdad Croes a actua di mala fe y a cobra di mas. Por lo tanto, Croes a perde e caso pues y mester paga e gastonan di e caso cu ta 1500 florin.
