Home Evenemento MARY JOAN BREAST CANCER SUPPORT GROUP Ta organiza e “Pink Bike Ride”

MARY JOAN BREAST CANCER SUPPORT GROUP Ta organiza e “Pink Bike Ride”

9
0
SHARE
- Advertisement -

ORANJESTAD (AAN): Luna di oktober ta luna internacional di conscientisacion di Cancer na Pecho. Durante e luna aki Mary Joan Breast Cancer Support Group lo bay tin diferente actividad pa conscientisa e pueblo di Aruba tocante di Cancer na Pecho.

   Mary Joan Foundation a worde funda 3 aña pasa y tin como meta pa: duna sosten na patient cu ta worde diagnostica cu e malesa di Cancer na Pecho, conscientisa nos comunidad ariba e malesa aki y recorda cu detection trempan di cancer na pecho por salba bo bida.

Pa por sigui haci e trabao nan aki,  Mary Joan Foundation mester di fondo. Durante luna di oktober ta combina conscientisacion cu recaudacion di fondo. Asina a bin cu e idea pa hunto cu organizacion di bikers na Aruba pa organiza e “1st Pink Bike Ride” cual lo tuma lugar ariba diadomingo 3 di oktober venidero.

   Sarah Hardeveld y Mariella Bosch ta representa clubs local di Harley bikers di Aruba. Tur e clubs a uni nan mes pa asina hunto organiza e prome Pink Bike Ride. Cual por cierto lo bira un ride annual. Nan como bikers ta sinti e necesidad cu mester enfatisa riba conscientisacion di cancer na pecho. Y nan lo demostra esaki door di core den e barionan di Aruba mustrando asina cu nan ta sostene e causa aki. Ta pesey mes nan ta haci un yamada na tur bikers, amante di brommer y car clubs pa hunto join den e ride aki cu ta bay ta uno grandi. Ya caba tin various miembro di e clubs  ta mustrando nan interes y ta super entusiasma pa e Pink Bike Ride.

   E ride mes lo tuma lugar 3 di oktober, pero anochi di inscripcion lo tuma lugar diabierna 28 di augustus proximo na Rum Reef  – JADS (antes Nanki Club na Sero Colorado) for di 7pm – 10pm. Inscripcion lo costa 50 Florin pa persona, lo cual ta encera: un T-shirt cu SHE Super Energy Drink a sponsor, un pin, un bandana y tambe lo inclui algo di come y di bebe durante e ride.

   SHE Super Energy Drink tambe a uni su mes na e grupo dinamico aki y ta aporta na e causa aki cu sponsor di e T-shirt cual tur e riders lo bisti oktober 3 venidero. Rum Reef – JADS lo ta e lugar central, caminda no solamente e inscipcion lo tuma lugar pero tambe caminda unda e ride lo termina.

Tur e organizacion nan ta haci un yamada pa bini hunto diabierna 28 di augustus y mustra bo sosten na e lucha contra cancer di pecho y asina tambe sostene Mary Joan Foundation den su trabao valioso pa nos comunidad.

   Pa mas informacion por yama; Merveline Geerman tel: 593-4821, Mariela Bosch tel: 593-3633,  of Big Twin tel: 582-8660 y puntra pa Sarah Hardeveld

- Advertisement -

DUNA COMENTARIO

Please enter your comment!
Please enter your name here