MEP cu un Rumbo nobo!
Segun Lider di Fraccion di MEP, Booshi Wever
Fraccion y directiva riba un linea manera un TEAM!
ORANJESTAD(AAN)– Den un comunicado di MEP lider di fraccion di e partido ta menciona cu despues cu MEP a wordo sacudi cu resultado di eleccion, MEP como organisacion a hasi varios evaluacion y for di esakinan a sali afo cu un aspecto cu definitivamente mester ser atendi ta cu MEP mester bira un TEAM, un solo EQUIPO! “Cu esaki den mente e directiva actual ta dirigiendo nos organisacion politico.” “E espirito aki, esta funciona como UN SOLO EQUIPO, ta manifesta su mes den e funcionamento tanto den directiva y tambe den e fraccion di MEP.
Ta pesey hopi biaha e lider di fraccion ta e persona cu ta trece e informacionnan padilanti, pero semper despues cu esakinan a ser discuti den un forma amplio internamente y caminda cada representante a haya e oportunidad di trece su punto di bista dilanti.
Den otro palabra, ta importante pa cada hende haya e oportunidad di expresa y discuti a base di argumento. Al fin al cabo democracia ta prevalece manera semper MEP a boga di ta.
O sea un partido democratico caminda tur hende tin e derecho di expresa y sea cu e ta pertenece na e opinion di minoria den un cierto opinion, importante ta cu e ta ser scucha y ta tene cuenta cu tur hende su opinion.
Cu esaki e dialogo interno ta ser stimula caminda diferente plataforma a ser institui cu e meta di crea opinion y punto di bista colectivo envez di individualismo cu nos a conoce den pasado y cu ta un di puntonan cu a resulta cu mester traha pa mehora.
Nos ta consciente di e diferente lineanan di pensamento riba con pa hiba politica y ta mas efectivo y eficiente. For di esun di copia otro partidonan y ta fuerte den expresionnan na momento cu ta trece un punto dilanti te na esun cu mester traha ariba nos organizacion, re-organiza nos mes y yega bek den contacto cu e comunidad.
Nos a scoge pa traha ariba e ultimo puntonan, esta re-organiza nos partido, prepare asina pa tuma e retonanan nobo den un proximo gobernacion y alavez creando bek e contactonan den comunidad cu tanto partido MEP tabata conoci pe.
E linea di pensamento aki tambe ta loke directiva di MEP ta siguiendo den su programa cu mester ser bisa cu esaki ta uno hopi activo, cu atrobe ta funcionando den un forma na unda tur wowo ta dirigi den un solo direccion y un solo meta:
“MEP, mas serca di comunidad”! Esaki nos por logra solamente si nos tur sigui e rumbo cu Conseho di Partido hunto cu lidernan di bario a dicidi unanimamente: MEP un solo partido y cu un solo META!
Nos por mira tras riba con como TEAM a recauda fondo y na unda e pueblo a coopera en grande cu nos partido! Cu e fondonan recauda, e proyectonan na bienestar di nos pueblo y pa nos pueblo por ser organisa! Cu por cierto lo inicia e diasabra aki yama :
“Accion yenamento di papel di belasting”! Y otro siman lo tin e actividad riba tereno di Salud, caminda candidato nan ariba lista Dr. Gerrit Croes, y Dr. Maikel Kelly lo duna un chekeo medico y informacion ariba bo salud!
Asina ey lo bay sigui cu otro programanan y proyectonan cu lo mester desemboca cu MEP lo ta mas cerca di e comunidad!
Pues nos por mira cu tanto e directiva como e fraccion ningun momento ta neglisha nan responsabilidad al contrario, nan ta mas activo cu nunca, pero si como un TEAM!
Esey no kiermeen cu nos ta cla y cu nos no mester di mas hende pa join e TEAM aki! Ken cu kier subi e trein aki como parti di e TEAM MEP ta mas cu bonbini!
Pronto nos lo inicia cu e campaña di registracion pa TUR esnan cu kier ta miembro di e TEAM MEP. Nos lo tene pueblo na altura di tur acontecimiento cu lo bai tuma lugar organisa pa MEP!
E MEP re-structura, MEP cla pa un siguiente gobernacion,e MEP cu Betico tabata kier; esta un TEAM pa conhuntamente NOS logra e bienestar di nos pueblo y pa salbaguardia nos Status Aparte!
