Nicole Hoevertsz ta entrega medaya durante Weganan Olimpico Hubenil na Singapore
ORANJESTAD (AAN) – Den su capacidad di Miembro di Comite Olimpico Internacional, un di e tareanan cu Nicole Hoevertsz mester cumpli cu nan durante weganan deportivo ta pa participa na tur evento protocolar cu ta tuma lugar. Un di e ceremonianan aki ta e entregamento di medaya na e atletanan ganador den e diferente deportenan. Entre e mas cu 110 miembronan di IOC cu ta presente aya na Singapore actualmente ta ser reparti e ceremonianan di entregamento di medaya.
Ta notifica cada miembro di IOC na cua deporte e ta wordo spera di entrega e premionan. Pa Nicole esaki tabata varios evento den e deporte di landamento, como tambe di gimnasia.
Pa cada premiacion e miembronan di IOC ta ricibi un uniform pa bisti, pa asina tur e representantenan di IOC mustra mescos. Durante e ceremonia e medaya ta wordo entrega pa e Miembro di IOC, mientras cu hunto cu esaki un representante di e Federacion Internacional di e deporte ta hasi entrega di – den e caso aki – un mascota di e weganan olimpico Hubenil.
Riba e portretnan adhunto na e articulo aki por mira Nicole Hoevertsz durante un di e ceremonianan di premiacion, den e caso aki na landamento.
