Productonan cu supuestamente lo ta contene ingredientenan peligroso pa salud di hende
Reaccion di abogado Coffie:
ORANJESTAD (AAN): DIARIO a ricibi e siguiente comunicado di prensa di parti di abogado Bryan Coffie relaciona cu e caso cu Alex Croes di Giannis Nutrition Center a entama contra Ministerio Publico mirando e informacion di OM pa loke ta e caso cu a tuma lugar den corte siman pasa. “Como abogado di Sr. Alex Croes, mi kier a haci uso di e oportunidad aki pa reacciona como su representante legal riba un articulo cu a sali den Diario dia 27 di Augustus riba e caso cu a wordo trata diaranson pasa den corte. Esaki mirando cu aparentemente parti di e articulo lo ta basa riba declaracionnan di e vocero di Ministerio Publico.
Primeramente mi kier a trece dilanti cu e caso ta trata netamente un keho contra e confiscacion riba orden di fiscal di diferente producto di Sr. Croes cu Inspeccion di Remedi y Ministerio Publico ta considera como remedi. Sr. Croes ta considera esakinan, mescos cu na Merca, como suplemento natural, entre otro pasobra nan no tin un asina yama “medical claim”.
E opinion di Inspeccion di Remedi y Ministerio Publico ta contrario di diferente desicion di corte riba e mesun topico y nan ta opina cu un componente medico den un producto ta haci henter e producto un remedi. Den pasado Sr. Croes por a sigui bende su suplementonan natural a base di orden di corte.
Mescos cu Ministerio Publico y Inspeccion di Remedi tin nan propio opinion, Sr. Croes y ami como su representante juridico tin nos punto di bista riba e materia aki. Na final ta keda na corte pa dicidi kende tin razon of no i si Sr. Croes ta culpabel di cualkier hecho castigabel si of no.
Na e momento aki nos ni a yega na un caso penal mes ainda, motibo pakico e declarashon cu e productonan ta remedi i/o tin ingredientenan cu ta peligroso ta prematuro. Sigur mirando cu e declaracion ey por crea e imprecion incorrecto cu e productonan mes ta peligroso pa tur hende siendo cu no a wordo presenta evidencia scientifico pa cu esaki i no a wordo presenta ningun raportahe cu a constata cu e productonan aki ta dañino pa salud di hende.
Mester aclarea cu ningun di e productonan cu a wordo confisca a wordo marca pa ley como remedi ni ta contene ingredientenan activo (Ephedra Alkaloïden cu ta prohibi na Merca) di e mata Ephedra.
E productonan di Sr. Croes cu a wordo confisca tin certificado di benta publico di FDA i mag i ta wordo bendi na diferente pais na mundo sin wordo classifica como remedi. Te caminda cu Sr. Croes sa ningun di e productonan confisca a ocasiona morto di cualkier hende, ni e la ricibi keho di su clientenan di cualkier producto cu e a yega di bende of cu hende mester a bai hospital despues di a usa un producto cumpra na su tienda.
E motibo principal pakico Sr. Croes ta den corte ta pa su derechonan i tambe su opinion cu cada ciudadano mester por ta liber pa cumpra i usa supplementonan natural. Si ta asina mes cu cualkier producto por ta dañino pa salud esey no mester hacie automaticamente un remedi. Esaki ta un argumento hopi peligroso.
Usando e argumento aki lo por hasta marca por ehempel sigaria como remedi mirando su peligro pa salud di hende i asina cuminsa dicidi pa cada ciudadano kico nan mag di come, bebe of usa. Siguiendo e opinion di Inspeccion di Remedi hasta lo por bai regula e bebida Curaçao Liqueur (Blue Curaçao) di cual e ingrediente principal ta Citrus Aurantium cual ta un mata cu a wordo marca como remedi via un areglo ministerial na 2006, cual ta den disputa awor.
E ultimo aki lo significa cu tur persona (local o turista) lo mester di un receta di docter prome cu nan por bestel un cocktail di Blue Curaçao na por ehempel nos hotelnan i e importadornan lo mester registra e producto aki na e Comision di Remedi.
mr. C.B.A. Coffie
Abogado
