Prome cu fin di aña lo pone piedra pa renobacion y ampliacion di hospital
Minister Visser:
ORANJESTAD (AAN)(AAN):–Pronto lo cuminsa cu renobacion di Aruba su hospital. Un renobacion cu ta encera tambe un ampliacion di e instalacionnan cu nos tin actualmente banda di e hotelnan. Dr. Horacio Oduber Hospital lo bay mira un cambio grandi. Un cambio cu lo exigi un inversion di rond di 100 miyon florin. Den combersacion cu Minister di Salubridad Publico, Richard Visser el a splica cu prome cu fin di aña lo bay tin ponemento di prome piedra pa e proyecto aki.
E proyecto aki lo bay ta e inversion di Gobierno den e economia di Aruba, cu lo bay crea basta cupo di trabou.
E ta un proyecto cu e mandatario ta kere den dje, y ya caba ta papiando cu diferente instancia financiero pa mira kico ta e presupuesto di financiamento.
Ta trahando riba diferente aspecto tecnico, entre otro mapa nobo pasobra tin algun cambio cu kier introduci. Inicialmente a papia di hinca Laboratorio paden di e edificio di hospital, pero Gobierno actual ta mas na fabor pa e wordo hinca den un edificio apart pafo.
Haciendo esaki ta scapa un tiki placa. Nan lo keda den bisindario di hospital mes. E deliberacionnan cu e Huntanan envolvi ta andando continuamente pa yega na un linea di pensamento.
Ora di haci e “verbouwing”, lo haya un tiki menos camber cu tin awor, pero nan lo bay ta mas grandi, basa riba e necesidad na Aruba. E mandatario den e proyecto kier mira mehoracion di calidad, accesibilidad, resultadonan mas rapido di testnan, pues un fluho mas eficiente;
emergencia mester un cambio grandi. Y importante ta cu no kier pa e gastonan di operacion subi; y trahando mas eficiente.
A analisa e construccion di un hospital nobo. Y pa esaki a studia e costo, e economia di Aruba, a evalua kico ta mas importante, mirando tur e clinicanan cu tin rond hospital y tambe e financiamento di un hospital nobo.
E opcion di renobacion y ampliacion ta hopi mas factibel y un hospital nobo lo nifica un inversion hopi mas grandi. Segun e mandatario, a busca diferente conseho y tur ta mustra den e mesun direccion.
