Reunion fructifero di comision encuanto prevencion di narcotrafico, terorismo y crimen organiza
Clarisca Velasquez:
ORANJESTAD (AAN): Segun parlamentario Clarisca Velasquez, Reunion di Parlamento Latino Americano di comision di Seguridad Cuidadana, Combate y prevencion al narcotrafico, terrorismo y crimen organizado a worde representa pa parlamentario Clarisca Velasquez na Vera Cruz Mexico. Dianan 19, 20 y 21 di augustus 2010 ultimo Vera Cruz Mexico tabata sede di un reunion di suma importancia di e comision di Seguridad Cuidadana, Combate y prevencion al narcotrafico, terrorismo y crimen organizado!
E comision tin representacion di tur e paisnan di latino America, Centro America y tambe Mexico! E comision ta bin hunto pa traha riba legislacionnan riba tema y problema cu nos paisnan ta confrontando manera ultimo a keda traha y aproba e ley marco contra narcotrafico, prevencion y tratamento de las adicciones!
E comision a cuminsa traha riba ley marco pa preveni, sanciona y combati trata de personas (mensen smokkel y mensen handel) cu por cierto ta un problema grandi na e paisnan grandi manera Mexico, Colombia, Venezuela y hopi otro paisnan den Latino America y centro America.
Y nos como pais chikito mester prepara legislacionnan cu ta preveni, sanciona y combati trata di persona pasobra e no ta un problema leu y cu no ta pasa aki pasobra na e momentonan aki Aruba tin su prome caso oficial di trata di persona (mensen handel) y nos mester ta prepara legislacionnan pa por preveni y combati e crimen horibel aki!
Nos tin e crimen aki sanciona den nos codigo penal pero nos mester prepara mas legislacion pa preveni y combati esaki y pesey e reunionnan aki di Parlamento Latino Americano ta hopi importante pa Aruba pasobra nos por ta na altura con e paisnan aki ta atacando e crimen horibel aki y nos por haya hopi conocimento di nan legislacionnan y tambe adopta y adapta e ley marco cu nos ta trahando riba dje na Aruba su situacion.
Tambe nos di e comision aki ta bay trata e tema y problema di secuestro. Secuestro Dios gracia no ta algo cu ta pasando ainda na Aruba pero nos tambe mester prepara y tuma nota di kico e paisnan manera Mexico, Colombia, Venezuela, Argentina, Brasil y Ecuador ta haciendo den cuadro di Secuestro cu nos por cuminsa prepara pa adopta y adapta e ley marco pa preveni, sanciona y combati e crimen di trata di persona.
Nos por tuma nota con e paisnan aki ta atacando e problema grandi aki y cuminsa prepara e legislacionnan riba e tereno aki. Tambe e comision a concorda cu nos ta bay trata e tema di labamento di placa con conhuntamente nos preveni, sanciona y combati labamento di placa na nos paisnan y estrecha e lazo di trabao riba e tereno aki.
Aruba su contribucion lo ta grandi riba e tereno di labamento di placa paso for di añanan 1998 ja Aruba a cuminsa implementa legislacionnan riba e tereno aki. Nos por corda cu e aña ey M.O.T. a keda introduci conhuntamente cu LIFT, meldplicht pa instancianan y tipo di negoshinan manera lugarnan cu ta haci transaccionnan di placa y tambe despues a keda introduci ley pa kita propiedad, placa y pertenencia di balor di un sospechoso cu a enrikese su mes contra ley cu placa netamente obteni for di un crimen y tambe a bin ley pa meld placa cu bo drenta cu ne na nos frontera manera na nos aereopuerto por ehempel. Y dentro di poco e casinonan tambe mester bay meld na Banco Central contribuyendo asina na preveni e labamento di placa riba nos suelo Aruba.
Pesey mes ta hopi importante pa nos sigui tuma parti na e reunion di parlamento latinoamericano cual por cierto mayoria pais den region ta miembro pa asina nos intercambia di ideanan y traha riba legislacionnan cu por preveni, sanciona y combati e crimennan aki cu ta causando hopi tristeza y horror na nos paisnan y tambe con conhuntamente nos por bringa e crimennan riba tereno policial!
