Señora di 83 aña a descubri intruso cara tapa cu panty-hose den WC
Nos grandinan no tin tranquilidad mas
ORANJESTAD.(AAN):– Ta kico lo tin di hasi cu e tipo sin escrupulo cu a drenta den cas di un señora di edad respeta. Hopi ta esnan di edad halto cu tin di biba cu miedo y pasa den panico pa motibo di ladron cu ta kibra, drenta, trata of horta nan pertenencia. Tin diferente caso reporta na autoridad di varios pareha di edad cu no ta drumi cu trankilidad. Nan tin di keda atento pa nan no wordo sorprendi pa ladronnan. Diaranzon a presenta un otro ehempel,. Tabata pasa di mey anochi cu un señora biba na Montaña a yama warda di polis di Noord y a splica di a lanta den laat y a scucha desorden den baño.
E ciudadano a tuma un curashi pa bay averigua kico ta pasando den baño y pa su sorpresa el a topa un mucha homber, cabez y cara cubri cu “Panty- hose”. E intruso, ora el a haye confronta cu e señora doño di cas, lo a drenta den panico, spanta su alma, cu el a dal porta di baño sera y lock esaki.
Pa ora cu e señora doño di cas di 83 aña a logra habri porta e ladron cu intencionnan menos bon a logra bula bentana di baño y a desaparece den scuridad. Investigacion ta ilustra cu e ladron a kibra drenta y sali for di mesun bentana. Tin evidencia cu lo por pone polis riba un bon pista.
Aparentemente den e bario lo tin ladron tambe ta biba y no ta exclui cu tin dede den su direccion.
Si tecnicamente proba cu tin evidencia, e intruso, ladron sinberguenza envolvi lo no scapa.
Cu of sin panty hose lo pone man riba dje. Mas ainda lo cual e ladron aki a comete, debi na su accion di kibra, drenta, horta y spanta e señora di 83 aña por tin consecuencia si den e caso aki e ciudadano su salud a wordo afecta pa locual a tuma lugar.
A bira tempo tambe pa Ministerio Publico tene debido cuenta cu tin hopi ciudadano ainda ta victima di ladronicia, atraco y ta sinta cu trauma. Pa esaki tambe mester pidi castigo maximo pa frena e malhechornan. Comunidad kier su trankilidad.
PEN
Kico ta pasando den nos comunidad? awor ta ataca e mas indefenso no por! ley mester ser cambia pa caba pa asina un hende por pati cu palo di bat un desgraciado asina cu no tin nada di hasi den cas aheno!
angela
aruba su castigo mester subi pero subi mes na hopi anja cu nan no ta mira nie solo pa e sinberguensa nan sin gevoel gobierno lanta ariba pa e cosnan cu ta pasando castigo pisa cambia e ley mescos cu di merca anto ta wak si nan ta hasi e tipo di crimen nan anto peor cu hende di edad