Seppa y Duijneveld kier saca for di 24ora.com kende a critica nan y ta bay Corte
ORANJESTAD(AAN): Matutino DIARIO a entrevista Abogado mr. Dello Gomez, kende ta esun encarga pa representa e popular website 24ora.com den un caso cu a worde entabla contra nan door di e sindicato Seppa y Duijneveld. Dialuna Abogado Gomez a haya un peticion di SEPPA su presidente y sr. Duijneveld, exigiendo di 24ora.com cierto cosnan, entre otro e identidad di un di e personanan cu a haci comentario, segun nan, negativo contra nan. Y si nan nenga esaki, ta exigi pa nan rectifica riba e comentario cu a worde poni door di un tercera parti. Awor e caso lo worde trata dialuna mainta 9.30.
Mr. Gomez a bisa cu aki e defensa lo ta rond di e libertad di expresion y e rol di prensa virtual. E ultimo aki ta algo relativamente nobo pa Aruba. El a señala cu Abogado Duijneveld tabatin chens pa reacciona riba e foro en cuestion, pero no kier a haci esey y a prefera di bay Corte.
DUIJNEVELD: E Abogado a splica cu mas o menos 2 siman pasa nan a lesa un comentario riba un articulo di dje cu a sali riba 24ora.com. E abogado ta bisa cu normalmente e no ta reacciona riba cierto comentarionan, pero tabatin cosnan eyden cu a cay den mal tera cerca dje y cerca e ex Presidente di SEPPA Magaly Brito.
Nan a manda un carta pa e operador di e website 24ora.com pa sa ken ta e persona cu a pone e comentario. A haya carta back pidiendo tempo, cu a bay di acuerdo pero a bisa cu esey ta bon pero pa kita e comentario tur es tempo.
Abogado di e website a informa nan cu e no ta mira motibo pa kita e comentario pa cual, segun Duijneveld, nan a dicidi di bay Corte. E demanda ta pa divulga kende a pone e comentario negativo y si nan no a hacie, nan mes mester rectifica loke a worde poni.
Duijneveld a splica cu e cos ta asina difamatorio pe y pa e Secretario General di SEPPA y e sindicato mes, cu a pone cu e kier a laga Huez dicidi riba esaki. E no kier a bay cay den un wega di comentario, sin sa kende ta esnan cu ta haciendo e comentarionan.
Pesey e ta prefera pa laga un autoridad dicidi si e ta difamatorio y tur hende lo haya sa di esaki e ora. Tampoco e no a haya bale la pena pa pone un carta di su banda riba e website encuanto e comentario en cuestion.
Y e no por compronde tampoco e posicion di 24ora.com di no kier duna informacion di e persona, cu ta haci cu nan mester para responsabel pa loke worde poni riba e website.
