Diario Online

Si nos pidi pa tratado ta valido na Aruba, nos lo percura pa cumpli

Publication: Friday, 27 August 2010. Categoria: Politica

Premier Eman
ORANJESTAD (AAN): Prome Minister mr. Mike Eman ta bisa cu no tin problema cu e cambionan di Statuut cu lo bay trata na Hulanda proximamente. Y practicamente nan no ta afecta e relacion entre Aruba y Hulanda. Prome Minister a bisa cu e delegacion ta viahando pa Hulanda cu hopi positivismo pasobra e cooperacion den Reino a cambia drasticamente. Esaki pasobra a laga atras e actitud di polemica y polarizacion pa cu Reino Hulandes.
E mandatario a splica cu practicamente nada no ta cambia den e relacion cu Hulanda. Loke ta pasa ta cu Curaçao y Sint Maarten lo bira autonomo y a fiha con nan relacion lo bay ta cu Hulanda mientras cu e otro islanan a scoge pa keda den un relacion estrecho cu Hulanda den forma di municipio.

Y pa Aruba tin solamente un articulo, den e cambionan, cu ta den debate. Segun e mandatario a pidi pa ora Reino firma un tratado, esaki ta valido pa nos di Aruba tambe. Y cosnan asina ta trece obligacionnan cu nan.

E obligacionnan ta encera cu kisas lo mester traha riba cierto leynan na Aruba pa por cumpli cu e tratadonan cu nos kier pa worde ratifica pa nos tambe. Por ehempel, a firma tratado di Enseñansa Obligatorio. E ora lo worde exigi di Aruba pa traha un ley pa introduci Enseñansa Obligatorio na Aruba.

Awor ta asina cu ta bisa cu Hulanda lo por tuma paso pa pone nos cumpli, pero nunca a hacie.
Awor den e cambio di Statuut, a pone cu mester cumpli cu e obligacion y si esey no sosode, den Conseho di Reino por tuma pasonan pa pone e pais en cuestion (sea Aruba, Curaçao of Sint Maarten) cumpli.

Y esaki ta locual cu oposicion ta considera entregamento di nos autonomia. Eman a bisa: “Si nos mes ta pidi pa e tratadonan aki ta valido pa nos, e ora nos lo percura pa nos cumpli.”