Ta primordial concientiza pueblo di Aruba riba e importancia di Censo 2010
Minister Michelle Winklaar durante apertura di campaña di publicidad:
ORANJESTAD (AAN): Na Economische Zaken tabata tin un conferencia pa asina anuncia e campaña di publicidad pa Censo 2010. Minister Michelle Winklaar tabata presente unda el a hiba palabra y splica cu e dia ta hopi importante pasobra ta lanza Censo 2010. Segun e mandatario ta primordial pa concientiza pueblo di Aruba tocante di censo y e importancia di dje. A señala cu e ta importante pa e departamento cu ta handle esaki pero tambe pa tur departamento di gobierno como otro instancianan no gubernamental tambe cu ta usa e informacion aki. E mandatario a gradici su coleganan minister cu tambe a mira e importancia di e proyecto aki, cual a ser presenta na Fundacion Desaroyo Arubano (FDA).
FDA tabata tin hopi motibo importante cu a conduci nan financia e proyecto di Censo 2010, a laga sa. Minister Michelle Winklaar a splica cu departamentonan gubernamental y no gubernamental por haci uso di e cifranan di Censo 2010. Esaki ta informacion cu ta bay ta hopi importante y esencial pa e plannan den comercio y studiantenan tambe como di diferente instancia rond di pais Aruba unda nan ta bay haci uso di e informacion aki.
A expresa cu ta di aplaudi e forma cu CBS a traha pa asina den un tempo record por a keda cla pa ranca sali cu e Censo. E ta e resultado di hopi dedicacion, a enfatiza. Tin hopi departamento gubernamental y no gubernamental cu a duna un man pa laga nan personal participa como encuestador. Minister Michelle Winklaar a desea tur esnan cu lo haci e encuesta hopi exito.
