Home Editorial Un sentido di realidad

Un sentido di realidad

3
0
SHARE
- Advertisement -

jossy_mansur_picTa imposible pa mi sanciona cu silencio e obra maligno di MEP cu a laga pa Aruba un debacle economico di proporcionnan gigantesco. Cu Nel como lider di e partido, nos a mira un degeneracion político tuma lugar cu un constancia lamentable. Pesey ta necesario separa e nomber di Betico for di esun di Nel, pasobra e prome a fortalece e decoro di nos isla, el a crea nos historia patrio, el a bay den un lucha heroico pa nos Status Aparte, y el a boga pa husticia, pa Ley y pa e honor di Aruba. E di dos lo pasa pa historia como e político mas mediocre cu e partido por a haya como substituto, responsable primordial pa e ocho añanan di desperdicio, pa un periodo di berdadero desgracia y infamia, den cual corupcion, nepotismo y persecucion tabata e consignanan habitual di Gobierno.
Betico a hiba e nomber di Aruba te e cima mas halto, Nel a lastre te e profundidadnan mas scur di un abismo. Su ceguera voluntario cu a permiti un pasividad increible pa e tanda di abusonan cu a ser cometi cu e placa y e propiedadnan di Pueblo, a crea custumbranan y Ministronan inicuo y a mancha cu nan su partido y su Gobierno. Y ta e tin e pretension di exhibi su mes como e prototipo di un patriota? Esey ta propio di un figura manera Betico, pero nunca di Nel. Bo no por atropeya berdad y historia cu semehante descaro!

Cu e ex-Ministronan di su anterior Gabinete ta sinta den Parlamento pa recorda nos di nan hazañanan delictivo, ta otro di e logronan nefasto di Nel, atrobe pa e detrimento di su partido. Na lugar di habri caminda pa e hobennan cu a demostra capacidad y ta un promesa pa e renacimento honorable di MEP, el a benta nan den un hanchi y a pavimenta su avenidadnan pa e facil acceso di e mastodontenan di su partido na e asientonan di Parlamento. Cu semehante peso di ineptitud, ta dificil pensa mes riba progreso, corda pa soña cu e recuperacion di poder.

Ataca cualke Ministro di e actual Gabinete riba asuntonan cu nan no conoce a fondo, ta otro tremendo extravio, pasobra no tin nada mas facil cu proba cu e critica mester cay riba MEP, cu ta esun cu a origine. Pero esey mi ta laga pa e propio Ministro contesta y coregi, y asina demostra con bobo e representantenan di MEP a keda of a para bira!

E berdad ta cu e situacion financiero actual no ta facil pa Gobierno remedia; ocho aña di despilfaro a crea problemanan financiero colosal, cu ta bay tuma tempo coregi o elimina. Mi no conoce ningun formula facil pa hacie, pero mi ta convenci si cu e situacion mester ser encara cu energia y un sentido di realidad.

- Advertisement -

DUNA COMENTARIO

Please enter your comment!
Please enter your name here