Un atracador a horta pa cumpra lechi pa su baby y e otro tabata pasa dianan sin come
ORANJESTAD(AAN): Diabierna na Jeffrey D. y Vincio L.L a presenta dilanti di huez, debi na e hecho cu nan a wordo acusa di a comete 4 atraco. Uno tabata riba un muher di edad halto riba 12 di Januari, un atraco a wordo cometi riba un muher Haitiano riba mesun dia, un atraco a tabata riba un lugar di bende number na San Nicolas na November 2009 y otro a wordo cometi roba un mini market na San Nicolas tambe na November 2009. Huez a repasa parti di rapport di tur e casonan aki.
Pa loke ta e señora di edad y e señora Haitiano, e dos hombernan a ranca tas for di nan.
E muher di edad a declara cu e hombernan a bay cu su cartera cu placa, su dientenan falso y su celular.
Ora polis a bin na e sitio, e victima a duna un descripcion di e criminalnan. Na mes momento centrale post di polis a manda un patruya pa caya Rufo Wever pa un otro atraco y ora polis a yega eynan, nan a wak e dos hombernan cu tabata pas e descripcion.
E hombernan a core bay, pero polis a logra pone man riba nan despues. Un persona a declara na polis cu el a tende un muher grita y el a wal un homber ta tene e muher Haitiano y e otro tabata purba ranca e tas.
El a bin cu palo di basora riba e hombernan y e ora ey nan a core bay. Pa loke ta e atraco riba e lugar di bende number, e señora encarga a declara cu dos homber a drenta, di cual uno tabata tin un arma di candela den man.
E otro a keda para na porta, mientras cu e homber arma a punta e arma riba dje y tabata grita: “placa, placa”. E muher a bisa cu el a spanta y su nieta kende tambe a spanta a core bay.
Loke e ladronnan a haya ta 20 florin.
Pa loke ta e atraco riba e mini market, e hombernan a uza mesun modus operandi, unda cu V.L tabata tin e arma den su man, mientras cu J.D tabata para na e porta. Ora cu V. a pidi “placa, placa” y e homber a bisa cu e no tin, el a dal e homber cu e arma tras di su cabez.
Despues e homber a dune 50 florin for di su saco. El a pidi e Chines pa cigaria tambe y el a haya 3 paki. E dos acusadonan a admiti tur e atraconan.
V.L a bisa cu el a dicidi di comete e atraconan pasobra e tabata tin mester di placa pa cumpra lechi pa su baby, mientras cu J.D a declara cu hopi biaha e tin dianan sin come y pesey e tabata horta.
El a splica cu como cu e tin un permiso di studiante pa ta na Aruba, e no ta permiti di traha.
Huez a repasa e circunstancianan personal di e acusadonan tambe. V.L a nace na St Maarten y a bin biba Aruba cu 12 aña.
E tabata bay EPB San Nicolas, pero el a wordo expulsa. Despues el a haya oportunidad di bay EPB Hato y el a wordo expulsa di e school ey tambe, despues di un discusion cu un maestro.
Reclasering a traha un rapport den cual nan ta conseha pa e haya guia, pasobra e chens ta grandi cu e lo por sigui comete e tipo di crimennan aki.
Pa loke ta e circunstancianan personal di J.D, esaki ta un tiki mas tristo. El a nace na Haiti y como baby di dos aña el a wordo manda pa Aruba. E no sa mucho tocante su mama y e no sa ta ken ta su tata.
J.D tabata biba cu su wela kende tin problemanan psiquiatrico y despues el a wordo interna den Imeldahof. Despues di tempo na Imeldahof, el a wordo manda bek pa cas di su wela. E unico trabao cu e por a haya tabata pa empaketa saco na supermercado.
Huez a puntra den corte con por ta cu el a pasa hopi tempo na Imeldahof y nan no a regla un permiso pa e keda biba Aruba. E rapport psicologico a mustra cu J.D tabata practicamente horta pa e sobrevivi.
Un di e personanan perhudica esta e señora di edad, a presenta y a entrega un demanda pa loke a wordo horta for di dje. E hombernan a bisa cu nan a haya 5 florin den e tas di e muher, pero e muher a entrega un demanda unda cu el a bisa cu e tabata tin 500 florin den un envelope den su tas pa paga huur y cu nan a horta esaki for di dje.
E celular tabata bal 134 florin y e muher a pidi 500 florin pa e susto y trauma cu el a keda aden, despues cu nan a ranca su tas for di dje. Fiscal a bisa cu pa e crimennan aki facilmente e por exigi 6 aña di castigo.
El a bisa tambe cu cos no ta pinta mucho bon pa J.D specialmente, pasobra lo ta dificil pa regla un permiso pe, despues cu e sinta un castigo. Fiscal a exigi pa ambos sospechoso un castigo di 3 aña y 9 luna.
Abogado Esther Schwengle defendiendo J.D a bisa cu e rol di su cliente tabata hopi mas chikito cu e rol di V.L. El a bisa tambe cu e arma no tabata un arma di candela, sino un arma di presion di aire.
Ademas di esaki el a bisa cu e arma no tabata funciona bon. E abogado a bisa tambe cu su cliente no a haya mucho oportunidad positivo den bida. Segun Schwengle, fiscal no atene suficiente cuenta cu circunstancianan personal di su cliente, ni cu e hecho cu esaki tabata prome biaha cu el a yega di haya su mes den problema cu polis.
E abogado a indica tambe cu un señora di reclasering ta trahando duro pa regla un permiso pa J.D por keda Aruba. Abogado Celina Wever representando V.L tambe a bisa huez cu e castigo exigi contra su cliente ta mucho halto. Huez ta bay duna su veredicto dia 3 di September.
