Diario Online

“Pa mas di un decada mi ta piscando cu canaster y ami ta e unico cu ta wordo controla”

Publication: Thursday, 2 September 2010. Categoria: General

Segun piscador Rudolf Lacle: e ta cumpliendo cu ley!
ORANJESTAD (AAN): Rudolf Lacle pa mas cu un decada ta piscando cu canaster. Ultimamente e ta hayando masha problema pa por logra haya pan pa su yiunan riba mesa. E siman aki un biaha mas e tabata den diferencia di opinion cu un grupo di hende. Constantemente e ta worde molestia pa asunto di canaster. E ta cumpliendo cu tur leynan existente. Pesey mes e no por saca afor kico ta e problema cu guarda costa ta persigui e solamente cada biaha. Den entrevista cu DIARIO el a duna di conoce cu un par di luna el a haya algun problema ya cu nan a haye cu canaster piscando pafor di awanan teritorial. E tempo ey a prohibie pa pisca cu canaster pafo den awanan profundo.
Segun Lacle, awor e ta piscando den awanan menos profundo y e ta bolbe wordo molestia. Ya ta 4 biaha cu Guarda Costa a controle pa cu e asunto di canaster y e ta e unico hende cu Guarda Costa ta controla.

A señala cu e ta cumpli cu e ley. Tanto cu e midi pa loke ta e grandura di e wowo y e salida di e porta. E ta cumpliendo cu e rekisitonan prescribi pa LVV.

Rudolf Lacle cu esaki a bira algo personal. Nunca el a wordo notifica cu cierto piscanan of coralnan ta wordo protegi. Semper tur cos ta wordo haci tras di su lomba y e ta esun cu ta wordo molestia, a bisa.

E ta e unico y ta lamenta cu un arubiano no bay dilanti den su propio pais, a expresa.
Banda di esaki Lacle a señala cu semper ta busca manera di proteha cierto coral of pisca pa tiramento. Te hasta ora cu e piscador aki manda pisca awa back for di su canaster e ta haya problema.

A laga sa cu aunke el a laga e pisca bay bek, el a haya menaza cu nan lo pone boet tog pasobra e ta manda e pisca bek. Pisca cu no ta wordo comi, e ta tire bek na awa, a enfatiza.
Rudolf Lacle a splica cu Santa Rosa y Hadicurari ta e departamento mas mal organiza na Aruba. Nada ta wordo haci pa e piscador. E nunca a wordo notifica di ningun sorto di problema, awor kier traha procesverbal riba dje.

Loke cu nan tin ta algo personal contra dje y tambe contra su persona. E ta lamenta cu un arubiano ta haya un boet di 17 mil florin pa canaster, mientras cu un venezolano ta haya 3500.
A sigui bisa cu el a tende cu aparentemente Guarda Costa a haya ordo di un ministro. Esey e no sa si ta berdad. E no sa tampoco si Byron Boekhoudt ta actuando riba su mes. Kier haci y deshaci cu nan canaster, a agrega sin cu e ta wordo notifica kico a wordo haci.

Lacle a declara cu si e tabata tin placa e lo a bay abogado, pero ta keda algo fastioso. Tin un reda cu ta mata hopi pisca chikito y nada ta wordo haci cune, a bisa. Tin un persona den Guarda Costa cu ta un di e doñonan di e reda aki na Noord y e ta kere cu pesey nada ta wordo haci pasobra nan ta protehi, segun Lacle.

A enfatiza cu e uso di e canaster conoci na Merca of Venezuela como “cages” of “pot traps” ta permiti si pero bo mester tin un licencia.