Diario Online

Aeropuerto lo keda 100% di pueblo di Aruba

Publication: Tuesday, 7 September 2010. Categoria: General

Exitoso reunion di Minister Otmar Oduber cu Schiphol Group
no lo tin comisario pa Schiphol y Arubiano dentro di poco lo ta na cabez di AAA N.V.
ORANJESTAD(AAN)– Minister Otmar Oduber a sali diadomingo pa Hulanda pa atende reunionnan sumamente importante, sigur e reunion cu e grupo di Schiphol. Manera ta conoci, ex minister Briesen a firma un acuerdo cu e grupo aki caminda ta bende y entrega parti di nos aeropuerto na nan, algo cu sin duda algun no ta cuadra cu maneho di Gabinete Mike Eman. Minister Otmar Oduber a bisa claramente cu e kier sigui traha cu Schiphol, pero no bou di e condicionnan firma pa su antecesor.
E ta considera cu teniendo un nomber manera esun di Schiphol representando nos aeropuerto ta habri hopi portanan y ta pone nos na un nivel internacional sumamente respeta, esaki lo mester bay segun e reglanan di Good Governance cu mester existi den companianan di Gobierno y segun e acuerdonan cu originalmente tabata existi.

Di e forma aki dialuna e titular di Turismo, Transporte y Labor, acompaña pa Promer Minister Mike Eman y Minister Benny Sevinger a reuni cu Schiphol Group caminda tambe tabata presente dos miembro di Hunta di Comisario.

E reunion aki a dura mas cu 5 ora, pero por bisa cu a resulta di ta uno exitoso. Minister Otmar Oduber ta comenta cu a conversa cu alto ehecutivonan di Schiphol na Amsterdam riba diferente puntonan den un contrato cu lo mester a termina 31 di december 2009 y cu na cuminsamento di 2008 a wordo termina y a firma uno nobo cu lo dura te na 2013.

Den esaki Gobierno di Aruba, a traves di su Hunta di Comisario di Aeropuerto, cu aprobacion di Gobierno anterior y ex Minister Briesen lo a aproba cu lo bende accionnan di aeropuerto cu Schiphol y tambe lo a ofrece y duna un di e 5 comisariadonan di nos aeropuerto di Aruba na Schiphol pa nan por nombra un hende den nomber di Sciphol den e Hunta di Comisario.

“E dos puntonan aki pa nos tabata inaceptabel y esey ta loke nos a trece na mesa for di momento cu nos a reuni cu nan na april ultimo na Aruba.

Nos a mustra riba e hecho cu e Gobierno aki no ta bay honra e idea di bende accionnan, bende patrimonio di pueblo, den e caso aki nos aeropuerto. Mucho menos lo bay duna un stul di esnan cu tin cu representa e doñonan (100% pueblo di Aruba) den Hunta di Comisario, na representantenan di Schiphol”, Minister Oduber a duna di conoce.

Continuando, el a bisa cu den e contrato anterior tabatin cu lo mester prepara un yiu di tera den un periodo di mas o menos 3 aña pa asumi responsabilidad, pero Hunta di Comisario y Sr. Eddie Briesen como representante di Gobierno a bay di acuerdo den e di dos contrato pa elimina e clausula aki.

Ayera den e reunion e Ministernan a pone un biaha mas riba mesa y a logra cu dentro di poco lo nombra un director statutario cu lo mester cana hunto cu e director nombra dor di Schiphol pa na momento cu e persona aki ta cla pa asumi e responsabilidad lo haya un yiu di tera den e posicion di director di aeropuerto.