Aruba a haya hopi elogio den reunion di Conseho di Ministro di Reino
Prome Minister Eman:
ORANJESTAD (AAN): Tur e reunionnan cu Prome Minister Eman y su delegacion a tene e siman aki na Hulanda a bay den bon ambiente. Loke cu a resalta den e reunionnan aki tabata e bon palabra y elogio cu tabata tin pa pais Aruba, pa e manera cu semper a busca tur sorto di forma di cooperacion. Nos a combersa cu Prome Minister Mike Eman, kende a encabesa e delegacion cu a viaha pa Hulanda pa reunionnan importante relaciona cu cambio di Statuut.
E reunion mes di Conseho di Ministro di Reino a bay masha bon mes, segun Eman, y den esaki a atende e ultimo puntonan di Status Aparte di Curaçao y Sint Maarten, y e posicionnan nobo di e otro islanan a worde ratifica.
Tur e leynan cu mester bini na vigor, a worde ratifica y tambe nombracion di Gobernador pa e dos paisnan nobo. Y tambe a papia di reparticion di bienes.
Segun Prome Minister Eman, Aruba a haya hopi reconocemento pa e forma con a contribui e ultimo lunanan pa Sint Maarten y Curaçao haya nan Status Aparte.
A worde reconoci e posicion autonomo di Aruba den Reino Hulandes y e rol importante cu Aruba a hunga como inspirador pa e otro paisnan cana. Tambe a worde mustra con Aruba den un forma digno a hiba su maneho, luchando pa loke ta su derecho y semper kedando respetuoso pa e partnernan den Reino.
E forma di acercamento di Gobierno di Aruba ta duna realce na e pais di e manera aki y ta gana respet, segun Prome Minister Eman.
Pa loke ta e formacion di un Gobierno nobo na Hulanda, Prome Minister Eman a splica nos cu e situacion ta uno sumamente complica. Hasta ora di combersa cu esnan envolvi, ta worde bisa cu nan no por duna un idea con lo bay cristalisa e acuerdonan.
E diferente lidernan di partido ainda ta den combersacion. “Nos kier un Gobierno bon pa Hulanda, pero cu ta bon pa Reino tambe, habri pa coopera cu tur e islanan y cu un estilo di respet mutuo manera sr. Balkenende a cargue den e ultimo añanan di su gobernacion, tratando nos cu hopi respet”, Eman a bisa.
E prome mandatario di Aruba a reconoce cu tin corientenan politico na Hulanda cu no ta mira hopi den un relacion cu e areanan Hulandes aki banda.
No solamente tin un opinion cu no ta mira algo den e Constelacion manera e ta awe, pero tambe a expresa nan mes den un forma cu no ta respetuoso di nos hendenan. Y esey ta corientenan politiconan cu Eman no kier tin un influencia grandi den maneho di Reino Hulandes.
“Gobernacion di Hulanda ta algo di Hulanda. Nos tin cu respeta esey. Pero nos por expresa nos opinion cu nos lo kier mira un Gobierno cu tin responsabilidad pa cargoa pa pueblo di Hulanda, pero tambe cu nos; y aporta constructivamente na construccion di Reino”, a bisa.
Eman a enfatisa cu nan tin bon relacion cu tur e partidonan cu a yega di forma Gobierno na Hulanda y semper a respeta otro.
