Home Estilo Aruba Fashion Week ‘Aruba in Style’ pa 2011

Aruba Fashion Week ‘Aruba in Style’ pa 2011

0
0
SHARE
- Advertisement -

fashiopn4Minister Oduber hunto cu IMG y Aruba Fashion Group a anuncia na New York
ORANJESTAD (AAN): Manera ta conoci Minister Otmar Oduber na e momentonan aki ta na Merca pa diferente reunion, anuncio y presentacionnan. Ayera diamars tabata un dia hopi importante caminda cu durante e New York Fashion Week a keda anuncia e promer Aruba Fashion Week ‘Aruba in Style’. Minister Otmar Oduber, ATA, IMG y Aruba Fashion Group a anuncia diamars na New York e partnership di 3 aña caminda cu lo crea y ehecuta e ‘Aruba in Style’, un evento anual di moda, entretenimento y di estilo di bida cu lo tuma lugar na nos isla desde otro aña.
“Aruba ya caba ta ofrece algun di e mihor tiendanan di marca den Caribe y nos ta sinti cu e partnership aki cu IMG y e lanzamento di e evento ‘Aruba in Style’lo contribui na eleva e reputacion di nos isla como e Mecca di moda y estilo”, Minister Otmar Oduber a declara.

“Un di nos metanan mas grandi pa mehora turismo di Aruba ta di trece eventonan di nivel halto pa Aruba, manera ‘Aruba in Style’, cu lo genera un mayor reconocemento di Aruba como un destinacion di vacacion chic y sofistica”, el a agrega.

‘Aruba in Style’ lo ta un mezcla di shownan di moda, fiestanan, presentacionnan y shopping na un di e destinacionnan mas exotico di Caribe. E lo tuma lugar na diferente locacionnan rond di nos isla caminda cu lo trece diseñadornan, celebridadnan, modelonan, clientenan ‘fashionable’ y medionan di comunicacion hunto.

“Den nomber di Aruba Fashion Group nos ta hopi entusiasma di por traha hunto cu IMG y nos sponsor principal, Gobierno di Aruba y Aruba Tourism Authority. Mi ta sigur cu nos lo construi, cu e partnernan aki, loke lo bira e evento ms ‘fashionable’ den e region resaltando Aruba como e destinacion lider den moda y entretenimento den Caribe”, tabata declaracionnan di Damilice Mansur.

IMG, un lider den maneho, produccion y creaccion di plataformanan global di moda, lo trece su experticio den establece eventonan di presencia global como tambe contactonan di e industria y diseñadornan na e evento.

“E ta un tremendo oportunidad pa nos. Nos a mira hopi biaha den direccion di e region aki como un lugar caminda un evento di moda fuerte y global lo por a tuma lugar. Nos tabatin suerte di por a haya hendenan creativo den Aruba Tourism Authority y Aruba Fashion Group cu tabata comparti nos vision pa algo tanto sofistica, cool y distintivamente Arubiano” Peter Levy, SVP y Managing Director di IMG Fashion Worldwide a declara.

E acogida pa cu anuncio di e evento aki tabata uno hopi positivo y Minister Oduber ta sinti su mes confia cu e evento aki lo contribui na diversifica nos mercado turistico tambe.

Detayenan riba e evento, incluyendo e diseñadornan, modelonan y celebridadnan cu lo ta presente lo worde revela otro aña, pero por bisa caba cu e ta mustra di bira algo hopi grandi mes.

- Advertisement -

DUNA COMENTARIO

Please enter your comment!
Please enter your name here