Aruba ta keda cu su status autonomo den Reino Hulandes cu e mesun derechonan cu nos tabata tin semper
Prome Minister:
ORANJESTAD (AAN): Riba e aceptacion di tratado pa cu articulo 27 lid 3, Prome Minister Mike Eman a duna di conoce cu nada no ta cambia di e relacion di Aruba pa cu Hulanda. E cambio di statuut ta pa Corsow haya status aparte manera Aruba tin, pa Sint Maarten haye y pa e otro islanan bira parti di e comunidad hulandes. Aruba ta keda cu su status autonomo den Reino Hulandes cu e mesun derechonan cu nos tabata tin semper.
Tratado ta si bo tin, por ehemplo riba combati criminalidad internacional of riba enseñanza, y Aruba mes ta bisa cu e kier pa e tratado ey conta pa nos, e momento ey tin obligacion pa haci cierto cambionan, entre otro manera leerplicht.
“Si bo acepta e tratado di leerplicht, e momento ey bo tin responsabilidad tambe pa bo introduci leynan cu ta introduci leerplicht den bo pais”.
Den e articulo aki ta bisa cu si bo mes a pidi pa un tratado conta pa bo, e momento ey tambe bo tin cu ehecuta e leynan.
Finalmente prome minister a splica cu un parti di Hulanda a capta e mensahe cu ta mihor laga Reino funciona den e metanan comun unda nos kier bay.
Asina mes ki tipo di gobernacion lo tin na Hulanda no tin claridad riba dje. Nos mester tene cuenta cu tin partido na Hulanda cu ta menos amistoso cu nos islanan. Ta keda na nos pa informa Hulanda cu tin un concepto robes di nos islanan, nos potencialnan.
Nos tin un tarea importante segun prome minister Mike Eman. Durante e ultimo añanan e relacion a fria hopi.
Esey ta un problema pero por acerke negativamente door di reacciona contra di Hulanda of di acerca nan mas huicioso, cu strategia pa cambia e pensamento na Hulanda mes cu e relacionnan aki tin hopi balor tambe pa Hulanda, a manifesta.
