Diario Online

Batayon di Censo a subi caya y eleccion di Miss

Publication: Thursday, 30 September 2010. Categoria: General

Nan a cuminza bishita cas ayera. Censo 2010 ta moviendo. Tanto dia pasa tabata tin comentario riba e preguntanan cu ta ser haci y cu lo ta mas pregunta cu 10 aña pasa y awor el a wordo desmenti indicando cu ta menos pregunta of ta e mes cantidad. Mi no ta corda pasobra mi nunca a conta nan. A wordo bisa cu nan ta preguntanan cu ta bay hopi den bida di esun cu ta wordo entrevista, y preguntanan facil: “bo sa coba den nanishi den hende y bo sa scupi riba caya?”
Tin preguntanan cu ta midi bo balor manera: “bo ta dispuesto di reduci espectativa di bo bida cu 20 aña djis pa bira cacho di bo artista stima?”
Mi a cambia e pregunta un poco so, pero mi no a cambia e otronan y mi lo djis contesta nan.
“Si bo a wordo invita pa come na cas di un conocir y bo a haya un cacalaca den bo salada di batata cu berdura, kico lo bo haci?”

Mi contesta lo ta facil y directo. Mi lo haci e cos mas etico y di bon manera . Si ningun hende ta mira lo mi tira e cacalaca den tayo di mi amigo. Asina mi no ta pone cara di mi amigo na verguenza y lo mi ta haciendo locual religion a siña nos pa haci; comparti !

E siguiente pregunta: “si bo sa cu den un aña lo bo muri diripiente, kico bo lo kier cambia di e manera cu bo ta biba awor?”

Mi lo stop di haci ehercicio, come mas junk food, huma 6 paki di cigaria pa dia y hasta ta dispuesto di corta orea di mi señora sabiendo cu mi no muri te aki un aña.

“Cual ta e meta mas importante cu bo tin den bo bida: cumplimento, seguridad, stimacion, poder, diverticion, conocemento of otro cos ?”.

Mi tabata y tin ainda hopi meta den mi bida, pero actualmente mi tin un yiu homber y un nieta y ta spera di por haya tranquilidad y paz.

Ata e siguiente pregunta ta bin mes ora: “ Si bo mester pasa e siguiente dos aña cu un persona den un shelter na Noordpool , cu kende lo bo kier pasa e dos añanan ey ?”

Naturalmente mi lo escoge e muher di mas bunita na mundo. Mi lo a scoge mi señora pero mi no kier ta egoista: kende lo wak e ora ey pa mi yiu y nieta ?

“Si bo ta di muri awe nochi sin oportunidad pa comunica cu un hende, kico lo duel bo mas tanto di no a bisa hende?”

Loke lo duel mi mas tanto ta cu mi no a bisa mi señora, yiu y nieta cu sinceramente mi ta stima y aprecia mi auto masha hopi y pa nan no mishi cune.

“Pa 50 mil florin bo lo ta dispuesto pa pasa 3 luna largo sin baña, skeiro diente of usa deodorante”? Mi lo ta dispuesto sigur pero…. cuanto gobierno ta dispuesto di paga mi bisiñanan ?
“Bo ta dispuesto di entrega relacion sexual pa un aña si bo tabata sa cu e lo dunabo mas sentimento di paz compara cu kico bo tin awor?”

Esey sigur cu no, pero mi lo ta dispuesto si di entrega sentimento di paz pa un aña.
“Bo cas cu tur cos cu bo ta posee ta pega candela. Despues di a scapa bo sernan keri, bo tin tempo pa drenta cas un biaha mas pa scapa algo di importancia pa bo. Kico esey lo ta?”

Esey ta facil: mi paspoort. Si tin algo peor cu mira mi cas na candela, esey ta e perdemento di tempo na Bevolking pa bini cla pa haya mio paspoort. Mi ta corda un amigo di mi cu a drenta censo cu cabez yen di cabey y sali cu un pleki pelon. Mi a sinti duele di dje.

“Si bo por usa un popchi di voodoo pa haci daño na un hende, lo bo haci esey ?”
Mi no sa kende en particular lo mi kier haci daño cu un popchi di voodoo, pero definitivamente mi lo bay Bevolking cu e popchi ey otro biaha.

Mi ta spera cu e dianan aki mi no haya bishita cu e mes preguntanan aki. Ta bira tempo pa busca otro pregunta pasobra mi ta fada di contesta e mes preguntanan cada 10 aña.
Mas y mas enemigo mi ta haya tur ora cu mi conta di e preguntanan, pero pincipalmente ora nan lesa mi contestanan.

MISS-TOESTANDEN DURANTE ELECCION

Lagami cambia di topico.
Net awe mainta mi a mira un “miss-toestand” durante un eleccion di Miss na Australia y mi a sinta pensa.

Ata nan a anuncia e ganador robez.
Mi no sa bay eleccion di Miss pa motibo di e Miss-toestanden cu sa tin y tur aña bo ta tende di esakinan y yen di excusa ta bin dilanti pa tapa.

Na television mi no sa wak eleccion di Miss tampoco. Mi kiermeen despues cu pasa e mucha muhernan den bikini. Loke tin prome cu e presentacion ey y despues di e presentacion ta Miss-toestand pa mi.

Corda bon cu principio ta principio y mi mester mantene mi principionan.
Imaginabo cu bo ta mira eleccion y bo pastor preferi ta entre e hurado. (dependiendo di cual religion e ta: por ta cristian, rabbi, swami, mullah, domi etc.)

Ta net diadomingo pasa el a predica di importancia di evita placernan di mundo. E tabata asina fuerte cu su palabranan, cu casi bo a laga bo Blackberry un banda pa scuch’e.
Ate aki cu su wowonan gosando di e creacionnan di Dios su dilanti y sinta cu un sonrisa di orea pa orea.

El a ponemi corda dia cu un religioso noruego tabata pa forma parti di hurado pa eligi Miss Noruega. Hopi a wordo skirbi e tempo ey, indicando cu ta den su tempo liber cu e por haci kico e kier, hasta huzga muhernan den bikini. Tabata tin protestanan tambe y e no a forma parti.
Mi ta weita caba e preguntanan cu e lo mester a haya di su Superior.

“Ta berdad loke mi a tende? Bo ta bay forma parti di hurado?”
Ay ta nada , ta djis algo cu mi ta haci den mi tempo liber. Ta un bon manera pa haya contacto cu muhernan hoben cu mester di e mensahe.

“Bo ta yega cerca nan cu mensahe di misa of cu bo wowonan?”
Cu mi wowonan sigur. Pero no wowo di huzga. Wowo di observa e sensitividad di e candidatanan.
“No tin otro cos cu bo por haci den bo tempo liber. Tuma les di computer anochi por ehemplo?”.
Ay no… mi ta pasa mucho mi so sin goza di algo.
“Bo palabranan ta molestiami. Tur muher ta igual den bista di Dios. El a traha tur”
Si, mi sa cu nan ta igual pesey como miembro di hurado mi intencion ta di huzga cada un igualmente. Mi lo duna cada un mes tanto atencion y stimacion.

“Mi no por permitibo di forma parti di hurado. Bo ta representante di misa y ….”
Mi lo representa misa corectamente. Mi lo mantene honor y dignidad y naturalmente, un sonrisa grandi.

Mihor mi termina aki pasobra mi no ta den beis di skirbi riba religion awe. Mi ta capaz di bira mes hipocrita cu hopi cu hopi hende mas religioso cu esnan di misa mes, pero cu boca di ……
Juby Naar