Chaco Cornelio Referee di Taekwondo a ricibi carta di gradicimento
Pa su magnifico trabao na Youth Olympic Games
ORANESTAD (AAN) – Recientemente Jose “Chaco” Cornelio, Presidente di Aruba Taekwondo a fungi como refree den e deporte di taekwondo durante e Weganan Olimpico Hubenil. Esaki ta un reconocimento enorme pa Chaco Cornelio, demostrando asina su capacidad y neutralidad na momento di huzga peleanan di taekwondo. Chaco ta un referee hopi aprecia pa e organismonan internacional di e deporte aki, cu regularmente ta hasi un apelacion riba su persona pa actua como referee durante encuentronan internacional.
Fuera di e reconocimento aki pa Chaco, su participacion ta pone tambe e nomber di pais Aruba na halto riba e podio mundial di – den e caso aki – deporte. Y como gratitud Chaco a ricibi un carta di reconocimiento for di President di World Taekwondo Federation pa su excelente trabao na Singapore.
Pabien Chaco! Cu esaki ta demostra cu nos yiunan di tera ta wordo reconoci na nivel internacional den deporte.
Adhunto na e articulo aki por mira varios portret di Chaco Cornelio durante su actuacion como referee den taekwondo na Singapore durante e Weganan Olimpico Hubenil como tambe copia di e carta cu el a ricibi.
