Concepto Nobo Di Empleadonan Di Base “Temporario”
ORANJESTAD (AAN): Recientemente a tuma lugar na Kowloon Restaurant introduccion di un compania cu concepto nobo den servicio di empleado na un base temporario, “L&C Executive Manpower Services”.
E compania aki a haci un sondeo pa check con e demanda ta den sector laboral, y a constata cu hopi compania awendia no ta tuma empleadonan den servicio pa tempo indefini, sino mas bien ta bay via servicio intermediario.
Pesey considerando cu ya tin varios compania similar na Aruba, L&C a dicidi di check kico tur falta den e ramo aki, y bini cu un diferencia. Detayenan di e diferencia lo worde informa na e momento cu bishita cada un compania personalmente.
L&C lo brinda servicio di Cleaners, Waiters, Bartenders y mucho mas. Tambe si bo tin un fiesta priva, nos por brindabo e servicio di Cleaners, Waiters y Bartenders. Lo bay tin dianan specifiko cu L&C lo conduci entrevista, y lo anuncia esakinan den nos corantnan local.
Con pa aplica, masha facil. Ariba e dia di entrevista bini cu bo CV actualisa, 1 pasfoto, AZV valido, identifikashon valido. Y pa esnan cu tin permiso, e permiso valido. Gerencia di L & C ta conciente cu tin hopi hende eyfo capacita pa traha y no por haya trabao pa un of otro motibo. Bay aplica y te na unda cu trabao ta permiti, L & C lo yudabo bolbe integra den ramo laboral y cu exito.
E propietario di L & C un femenino local cu determinashon, cu 15 aña di experiencia como Gerente di Recursonan Humano, doño di Franxo’s All Inclusive cu 5 aña di existencia, Señora Karina Odor Croes, ta conta cu boso sosten y apoyo pa asina duna L & C e oportunidad pa contribui cu e mercado laboral y yuda hiba esaki na e siguiente nivel.
margriet
Tipo di companianan aki ta bon pa esnan desespera y falta di trabao. Pero experiencia cu a encontra cu ne cu un par di siman atras, un sra. latina cu permiso pa par di anyanan caba. A bishita SIAD pa mira cuanto Belasting Total ela paga durante tur e anyanan cu ela traha na e diferente companianan cu ela wordo manda pa traha. A resulta cu NUNCA un cen di dje riba su nomber NO a wordo buta. Tampoco NIUN hende NO a avise cu e MESTER busca Persoonsnr. tampoco MESTER yena inkomstenbelasting TUR anya. Dus e NO ta NI inscribi NI aparece den SIAD. Ken y kon por prueba cu companianan aki ta manda Realmente SIAD tur loke nan kita di Trahadornan?