Drecha y daña!
Den MEP tin actualmente dos coriente di comportacion y pensamento, uno encabeza pa Evelyn y e hobennan cu kier progreso den nan careranan político, y e otro dirigi pa Nel cu e unico intencion di stroba, daña y perhudica, no AVP, pasobra e no tin e capacidad pa haci esey, sino Aruba, cu tin mester di trankilidad pa navega den e laman bruto di problemanan cu Nel a laga atras. Di un banda otronan ta purba drecha e imagen di e partido, y contrario na nan, Nel ta insisti di sigui daña loke por a keda pa drecha. E prome tin bista riba futuro, e di dos riba pasado. Tempran of lat lo bin un confrontacion entre e dos corientenan ey, y na final di dje lo determina e posibilidadnan di e partido pa reconkista poder.
Ta obvio cu Nel no kier acepta ni reconoce cu su tempo a pasa; cu e ta manera un skelet político insepulto, o sea cu no a ser dera; y cu su vigencia den politica ta mas un estorbo cu un yudanza pa e partido cu na un tempo el a dirigi cu un poco mas di tino. E temor grandi ta cu su permanencia den politica ta bay convirtie den un caso incurable, cu aunke ainda e tin e oportunidad pa crea formulanan di progreso pa su partido, ta dunando ehemplonan di sterilidad inutil cu mester a desaparece caba for di un carera político cu a yega su fin.
Ayera e tabata protagonista un biaha mas di un espectaculo deprimente, ora cu el a dicidi di yama su ayegadonan pa acompañe te e sala di Staten, no pa scucha y prepara ideanan pa contraresta cualke posible proposicion contrario na esnan di dje, sino pa forma bochincha y stroba otronan di haci e trabao pa cual Pueblo ta paga nan bon placa.
Kico el a kere cu e por a aporta na e posicion di su partido a keda den aire. Su presencia tabata completamente innecesario, pasobra otronan den su partido ta mas cu capacita pa conduci e linea di oposicion rekeri pa e bon funcionamento di Parlamento.
Si den MEP no tin voznan autoriza pa delibera cune y convence cu su mihor aporte na partido ta su ausencia di cualke expresion publico, ta bira hopi dificil pa purba drecha loke ta daña. No ta por nada cu Pueblo a manda MEP cas den eleccion cu a pasa.
E no ta un obra di casualidad ni di cosnan imprevisto. Ta e actuacion di su Gobierno, cu Nel na Cabez, a convence e Pueblo votador cu tanto infamia, tanto corupcion y nepotismo no por sigui, y un mayoria grandi a dicidi di pone un fin na nan. Si ainda e mensahe ey no a penetra cerca e dirigentenan di MEP, anto no ta existi mucho speranza pa nan den e tarea di drecha loke ta daña.
Den MEP tin un generacion nobo cu ta batiendo na porta di e bida publico di nos isla. Ta nan deber di crea un consenshi civico interno pa asina construi un partido civilista. Nan tarea no ta facil, pasobra di paden y di pafo nan lo topa cu resistencia, tin biaha hasta feroz.
Di paden, e lo bin di parti di esnan habitua na vicionan bieu; di pafo e lo bin di un partido energico y efectivo, o sea AVP. E Gobierno di Mike Eman ya ta cosechando logronan categorico pa nos isla, y e lo sigui riba e mesun rumbo ey pasobra e ta un partido organiza, cu ideanan homogeneo, cu un mistica di servicio aplaudible.
Si e speranza ta cu e lo titubea na caminda, por wel di cuminza saca e idea ey for di cabez, pasobra esey no ta bay sosode. Tin un comprension categorico den su filanan pa loke ta e interesnan di e partido, cu ta liga na e interesnan di Aruba, y ningun di su integrantenan ta entreteniendo ideanan di rebeldia o separacion.
Nan por tin posicionnan adverso tin biaha na cualke proyecto di Gobierno, loke ta normal den un democracia, pero ta te ey e ta yega tambe. Ta existi e siguranza cu ningun di nan ta suficientemente desorienta pa busca progreso político unda e no ta existi.
