Drogadiccion of alcoholismo no ta worde considera maleza den ley di SVb
ORANJESTAD (AAN): E seguro medico di Aruba no ta un instituto cu tin un cobertura ilimita. Tin cosnan cu no ta worde considera un malesa, manera adiccion na droga of alcohol. Pa cuminsa, e director di SVb ing. Edwin Jacobs ta bisa cu mester cuminsa pa analisa kico ta un malesa. E no ta algo cu nan por bay na haci riba nan mes. Mester mire den cuadro di loke ta prescribi. Y ley ta describi kico ta malesa y ki momento bo por perde compensacion pa motibo di malesa.
Articulo 7 inciso 1A ta bisa cu un trahador ta perde derecho riba compensacion (seguro di malesa di SVb) ora cu ta trata di un malesa cu e mes a causa of si esaki ta algo cu su mes a hinca su mes aden manera alcoholismo of uzo (abuso) di droga.
Un persona asina no ta ricibi compensacion di su dianan di AO. E por bay AO si e kier si. A base di e problema aki den comunidad, SVb na 1996 a sera un acuerdo cu e organizacion SAMBA.
E organizacion aki a demostra SVb cu nan tin un programa di rehabilitacion profesionalmente hinca den otro.
Pues si tin un asegurado cu e problema aki, SVb lo paga su dianan di AO si e compromete su mes pa participa den e programa di rehabilitacion di SAMBA cu tin un duracion di seis (6) siman.
Sinembargo SVb no por indica con grandi e grupo aki ta pasobra nan no ta worde registra apart. Nan ta aparece cu tur otro hende como personanan cu a bay AO.
