Home Editorial E agresion contra nos reportero

E agresion contra nos reportero

0
4
SHARE
- Advertisement -

jossy_mansur_pic        Si Ministerio Publico ta kere cu e agresion cobarde (y salvahe!) contra nos reportero ta bay conta cu e pordon di tempo, e ta masha ekiboca! Den hopi caso, nos a haya e impresion cu O.M. ta steun riba e efecto di tempo pa aminora e severidad di un infraccion cu e no kier investiga te den su ultimo detayenan, tratando di laba man manera Pilatus, djis pasobra, manera nos ta mire, ta trata di un of otro medio cu no ta di su agrado. Wel, laga Ministerio Publico preta faha pasobra nos ta bay “all out” den e caso aki pa obliga e autoridadnan local cumpli cu nan mision, cu ta esun di protege e ciudadano contra actonan di agresion, y condena esnan cu ta comete nan. No tin otro manera di mire, pasobra un institucion mes valioso cu Ministerio Publico no por bira victima di e capricho di algún Fiscal di pasa-tempo prome cu nan bay back nan pais di origen.
           E siman aki lo tin deliberacionnan intenso dentro di e cuadro dirigente di DIARIO, y e activacion di tur nos contactonan den exterior, tanto na nos continente como na Europa. Nos no ta bay tolera e tipo di actonan aki contra un periodista cu no a haci nada otro cu eherce su labornan dentro di e marconan cu democracia ta impone den un Estado di Derecho. Bo mester ta basta ingenuo pa no kere cu nos ta bay activa tur e contactonan ey, especialmene via S.I.P., pa den e ocasion aki Husticia ser aplica manera debe ser. Tur e evidencianan ta riba mesa, y tur ta confirma un abuso colosal, sin provocacion, di un elemento cu segun tur apariencia tin problema pa controla su rabia o temperamento.

            Di mes nos isla no ta conta cu e imagen cu e merece pa loke ta trata crimen y castigo; e caso di Natalee no a yuda den nada pa coregi, mehora o elimina e dudanan, sino cu al contrario el a contribui na magnifica nan. Den mi opinion, e actitud pasivo y hasta tolerante di Ministerio Publico den e caso ey a contribui hopi na e criticanan cu ta skeiro contra nos isla den exterior. Ken cu ta por constata e hecho ey riba internet y den contacto cu e autoridadnan di opinion y di accion na Merca. E consenso ta cu na Aruba no tabata existi e boluntad pa maneha e caso manera cu e normanan ta exigi. Awor ta bin acerca un agresion fisico contra un di nos reporteronan femenino, cu ya a cuminza causa malestar adicional contra nos isla den exterior, precisamente na momento cu Otmar y su ekipo ta haciendo un magnifico trabao pa despeha e dudanan y presenta un imagen renova di nos isla.

             E splicacion di un fiscal auxiliar cu ta trata di un “agresion simpel” y pesey ta pone e agresor den libertad, ta di consumo pa e ingenuonan cu ta zweef mescos cune den laira. Un agresion simpel? Y e ta den rolstoel? Y e no por cana? Y e tin e marcanan di violencia riba su curpa? Si esey ta un “agresion simpel”, anto ta mitad morto mes bo mester ta pa ser considera un “agresion mediano o severo”! Y pakico a pospone e denuncia di e acto di agresion te e dia siguiente? Pakico no a tume mesora, ya cu e detayenan tabata fresco y por a ser constata di biaha? E ta bolbe hibami back te e caso di Natalee, y e falta di accion durante e prome dianan siguiente na e desaparicion di e mucha muher! Mi ta nenga di kere cu esaki ta e procedimento normal den casonan di agresion, y si e no ta, anto pakico a actua di e forma ey den un caso den cual tur e evidencianan tabata riba mesa di biaha y por a ser constata sin mucho esfuerzo?

            E idea no ta pa acusa, sino pa busca splicacionnan racional pa cosnan incomprendible cu a sosode den e caso aki. Al fin y al cabo nos ta un isla di Ley y di Orden! Pa cumpli cu e exigencianan di tur dos, nos ta bay activa nos contactonan den exterior y cartanan di protesta, cu e evidencianan grafico di e caso lo bay pa Sociedad Interamericano di Prensa y e otro asociacionnan di prensa relaciona cune den nos hemisferio y na Europa. Nos ta desea un claridad absoluto di e caso aki y pakico cosnan a bay asina robez!

- Advertisement -

4 COMMENTS

  1. Jossy, Saludos.Laga nos bisa ley hulandes ta bon pa hulanda.E condado Aruba,un State di Hulanda;Status aparte ,Ley apparte mester bini pa cada condado.Ora un macamba comete un crimen na Aruba e mester sinta castigo na Aruba;no core hibi Boneiro.NO.!!!!! Staten di Aruba i parlamento mester traha ariba un ley nobo pa es condado di Aruba.Aruba no ta un Provencie sino un status apparte.Loke ta bisabo tambe flexible i por modifica ley na es cristerio di e pais Aruba. Por e hemplo,Security Guard nan of security Guard di Hospital cu ta publiko pero ;si tini su mes reglanan mester protega cliente cu ja ta den custodia di hospital or bo drenta es parking lot. I mester representa e ley di e pais Aruba.E security guardnan ora a mira witness i crimen comete ariba nan teritorio publico mester a tene e meneer aki te ora polis presenta; i tuma e caso over.(” No Tonton Macoute”)Ta pesei tini polis pa evita cu cos bai for di man (Hand) sino Glenn lo no a bai warda di polis ta einan mes Elo a keda den intensive care# 200.Si Maria ta watata tini un Body guard bon!!!. E surnam ei no a comporta su mes bon den e pais Aruba. Bise pa bai su pais .E ta causa problemaaaaa.I costa ARUBIANONAN hoie dinero.

  2. Asina mes manera Jossy ta bsa.
    Ta parse cu Fiscal Auxillar no tin mama ni ruman muje.
    Nos tin cu defende nos Dmocratia y laga Prensa haci su trabow sin miedo di wordo agredi, sino nos democracio lo bira “DEMOPULIOCRACIA”.
    Mi deseonan di pronto recuperashon pa e valente periodista aki y cu e incidente di violencia no bolbe sucede, pasobra aki na mundo tin hopi “Copy CAT” cual nan ta pensa cu ta un bon forma di atrae atenshon.
    Jossy mi ta all the way cu lo ke bo a scibi, emanda e Animal ey asta su caminda di cas.

  3. Welcome back Jossy….Por fin despues di basta anja mi ta bolbe lesa algo cu ta na e nivel mi ta expect di bo como editor di un corant y cu mester ta manera un voz pa refleha e sintimiento di e pueblo y pa su educacion SIN tin pone sintimientonan partidista politico. Ban wak si esaki ta simplemente un “Flash di pasado” of berdaderamente un cambio pa mihor….

  4. Parece cu boso nan a lubida tempo cu Pader Lampe y Thijsen a wordo agredi malamente cu mokete y schopmento pasobra Lampe y Thijsen kier a entrega prensa SIP un documento. No tin mas ingorancia cu Jossy cu ta maltrata hende tur ora y awor ta sali na defensa di prensa. Bai fliet abusador

DUNA COMENTARIO

Please enter your comment!
Please enter your name here