Diario Online

E luznan di hotel di Ritz Carlton lo no atrae e turtuganan

Publication: Saturday, 4 September 2010. Categoria: General

Segun abogado Carlo,
ORANJESTAD(AAN): Diabierna a tuma lugar un caso den cual un grupo di ambientalista a hasi un peticion pa kita e vergunning cu Desaroyos Hotelco a haya, pa construi e hotel di Ritz Carlton cerca di Fisherman’s Huts. Ta asina cu Hotelco a haya un vergunning pero e grupo di ambientalista cu ta inclui FANAPA, AMMF, Rainbow Warriors y Turtuga Aruba a cuminza un caso pa e vergunning aki wordo kita, pasobra Hotelco lo no a tene su mes na cierto rekisitonan, incluyendo tene cuenta cu e hecho cu net den e area ey e turtuga Loggerhead ta pone su webonan. Despues di tratamento di e caso, DIARIO a entrevista abogado Antonio Carlo, kende ta representa Hotelco.
El a splica cu e caso aki ta parti di e caso cu e ambientalistanan tin contra Minister di Infrastructura, cu ta pa kita e vergunning otorga di parti di e Minister na Hotelco.
Diabierna huez a scucha Hotelco, pa wak kico ta su posicion.

Carlo a mustra huez riba e hecho cu no tin base pa suspende e permiso di construccion, pasobra e vergunning aki ta cumpli cu tur regla legal. Segun Carlo, e desaroyador Hotelco, a tene cuenta cu tur e interesnan ambiental, na momento cu a prepara e proyecto.

Esaki ta nifica cu no tin ningun motibo valido pa suspende e permiso di construccion duna nan Hotelco. Carlo a sigui bisa cu dos rapport a wordo traha.

Uno ta un MER rapport cu ta hasi un estudio riba e efectonan ambiental di e proyecto y e estudio a wordo hasi riba e tereno ey. Ora cu Gobierno a tuma e decision di duna e tereno den erfpacht, nan a tene cuenta cu tur e aspectonan ambiental.

Esaki segun Carlo, kende a sigui bisa cu su cliente ora e ta bay construi e hotel, ta bay tene cuenta cu tur e aspectonan ambiental poni den e rapport.

DIARIO a puntra Carlo tocante e hecho cu e ambientalistanan ta bisa por ehempel cu entre otro e luz y e hendenan na e hotel ora e keda cla, ta bay stroba e turtuga loggerhead, como cu esey ta e area unda tur aña e turtuga ta pone su webonan.

Carlo a bisa cu Hotelco a combersa caba cu e organizacion Turtuga Aruba tocante esaki y a yega na e palabracion cu Hotelco ta bay tene cuenta cu tur e aspectonan cu a wordo señala of recomenda den e rapport, cu yama un ‘Turtle Addendum’.

Den e documentonan aki un recomendacion ta wordo hasi pa maneha e luznan na e hotel.
E luznan di e hotel ta bay ta di tal forma cu e no ta bay atrae e turtuganan.