SIMBA otro sindicato cu no a firma protocol
Gerencia di APFA mester bay y punto!
ORANJESTAD (AAN):— SIMBA sindicato cu ta representa e bomberonan ta indigna cu e contenido di e protocol bilateral. Esaki pa motibo cu e contenido ta perhudica e bombero den tur sentido mirando cu e bomberonan ta masha mal paga mes! E miembronan di dicho sindicato a vocifera nan punto di bista, esta cu no ta acepta e protocol aki pasobra e no ta uno husto y no ta acepta ningun medida di gobierno cu ta desventahoso pa e miembronan di SIMBA.
SIMBA ta sostene e accion di firma di e sindicatonan TOPA, SPA y SCCA, pero no ta kere den e ultimatum mirando cu e mayoria ta conta y esaki a tuma lugar caba, pues mayoria di e sindicatonan a firma e protocol aki.
Pa loke ta e maneho irresponsabel den APFA ta exigi pa gerencia bay y punto!
Esaki pasobra no por papia bon e maneho desastroso aki cu a inverti sumanan gigantesco di e empleadonan publico sin tene na cuenta e riesgonan envolvi y tambe mirando e rapport di Banco Central cu a mustra cu no tabatin maneho adecuado y no tabatin ningun linea di maneho pues un incapacidad pa e directora.
“Si un bombero bay cas cu un slang di brandweer, e ta wordo sera y ta perde trabao. Kico ta e suma gigantesco cu sin ningun tipo di responsabilidad y conocemento a wordo gegambled y awe kier pone consecuencia riba lomba di e trahador publico?”, asina presidente di e sindicato sr. Davny Rosa a duna di conoce.
650 miyon florin no ta poco placa y apesar cu a bin recupera algo di e suma aki, hamas gobierno por logra pone e placa aki bek y pesey mes mester pone e directora personalmente penalmente responsabel pa e mal maneho sin tene na cuenta e riesgonan y sin tin conocemento den e material a desangra e fondo aki.
