Home General Huez a haya cu ta corecto cu Endy Croes a worde kita...

Huez a haya cu ta corecto cu Endy Croes a worde kita como director di Lotto

1
0
SHARE
- Advertisement -

*Ex director di Lotto no ta haya un compensacion financiero pa e hecho cu el a worde kita
ORANJESTAD (AAN): Diamars huez di corte di prome instancia a dicta na fabor di Fundacion Lotto Pa Deporte, den nan caso contra director di FLPD Endy Croes. Ta asina cu FLPD a suspende Croes for di dia 4 di Januari 2010, pa motibo cu tabata tin indicacion cu Croes den su funcion como director a comete varios acto incorecto y ilegal. FLPD pesey a laga oficina di accounting Ernst &Young haci un investigacion riba esaki.
Resultado di e investigacion a worde poni den un rapport na Juni y e rapport ta confirma e sospechonan cu FLPD tabata tin, riba funcionamento dudoso di Endy Croes. Croes sinembargo ta di opinion cu el a actua corectamente y a entama un caso sumario pa asina e haya su trabao back como director.

Huez sinembargo a dicta Diamars cu e decision di FLPD di kita Endy Croes como director tabata corecto, pues e relacion di trabao entre Croes y FLPD ta keda termina. Huez den su motivacion a mustra riba diferente punto.

Entre otro huez a splica cu rapport di Ernst & Young a mustra cu Croes na diferente occasion no a pidi aprobacion pa cierto viahenan di trabao y cu durante e viahenan aki el a uza e credit card di Lotto pa su mes y pa otronan cu tambe a biaha cune riba gastonan di Lotto.

Tur esaki siendo cu Lotto mester a paga tambe na e personanan aki placa di dia durante nan viahe. Tambe ta asina cu Ernst & Young a constata cu Croes a entrega recibonan halto na Lotto pa e haya placa como gastonan di representacion, siendo cu e ta haya tur luna placa caba pa gastonan di representacion.

E rapport a mustra tambe cu Croes como director di Lotto a haci pagonan na hende, di cual no por worde constata cu e pagonan aki tin di haber cu un relacion di trabao di e hendenan aki y Lotto.

Huez a bisa den su evaluacion di e caso, cu e ta di acuerdo cu FLPD, cu tur esakinan ta malversacionnan cu sigur tabata motibo pa kita Croes di trabao di inmediato, si esakinan lo a worde descubri anteriormente.

Awor cu e malversacionnan aki a worde detecta pa Ernst & Young, esakinan por worde uza como motibo urgente pa termina e relacion di trabao entre Croes y Lotto.

Esaki pasobra ta trata pues di e hecho cu Croes na un manera ilegal a paga hende placa cu ta pertenece na Lotto.

E huez a bisa tambe den su sentencia cu un director di un fundacion cu un meta publico, mester score halto riba e trapi di integridad y no mester existi ni duda, cu e director aki lo a beneficia su mes financieramente a costo di Lotto.

Endy Croes a faya den esaki, pasobra e imagen cu e oficina di accounting ta pinta di Croes, ta di un funcionario cu a considera Lotto como di dje y door di esaki e no por a diferencia entre loke ta di Lotto y kico ta di dje.

E huez a bisa cu ta completamente corecto cu Lotto no ta acepta esaki. Corte ta considera e resultadonan den e rapport como corecto, specialmente mirando cu di banda di Croes no a bin bon splicacion pa mustra lo contrario.

Huez a splica cu ta resalta cu for di banda di Croes, no a gasta ni un palabra riba e topico.
Croes den su comentario riba e concepto di e rapport di Ernst & Young, a haci intentonan pa desmenti loke e rapport a trece dilanti, pero e intentonan aki ta keda pega cada vez, door cu e banda di Croes ta menciona vagamente existencia di cierto documentonan, cu no a worde treci dilanti.

Huez a bisa cu corte no tin motibo pa pensa cu Ernst & Young den cuadro di e investigacion lo a scoge solamente documentonan cu ta bay contra Endy Croes. Si tabata asina mes, Croes tabata tin for di 9 di Juli 2010, ora cu e rapport final di E&Y a worde ofreci na dje, hopi tempo pa colecta e documentonan cu e ta haya cu ta mustra cu su actuacionnan tabata corecto. Sinembargo esaki no a sosode.

Mirando e motibo pa cual a yega na terminacion di e relacion di trabao cu huez a haya corecto, Croes lo no haya un compensacion financiero, segun e veredicto di huez.

- Advertisement -

DUNA COMENTARIO

Please enter your comment!
Please enter your name here