Diario Online

Huez ta duna grupo di mucha homber razon

Publication: Tuesday, 7 September 2010. Categoria: General,Judicial

Y awe mes por drenta cu cabey largo na scol
ORANJESTAD (AAN):– Un grupo di 50 mucha homber no a ser permiti pa subi tereno di scol pa motibo cu e director a haya cu como mucha homber mester tin cabey cortico pa asina por haya les na EPB na San Nicolas. Den sala di corte tabata presente director y director interino mas e directiva di e Fundacion EPB. E grupo di mucha hombernan aki a keda representa pa abogadonan Scheper y Marchena. Den e requisitorio di e abogadonan como defensa nan a trece padilanti cu e grupo aki a keda perhudica di nan estudio djis pasobra nan a dicidi di tin cabey largo y momento cu a haya e reglanan di scol ningún caminda tin por escrito c unan mester tin cabey corta pa por drenta scol.

Ademas e abogadonan a mustra cu den e agenda di aña escolar nobo tin mucha hombernan cu cabey largo y tambe cierto reglanan, na unda cu e nobonan no ta cuadra cu esnan cu EPB ta bisa tin awor.

E studiantenan dia 1 di September ultimo a manda un carta dirigi na EPB pa nan por haya les wardando e resultado di e caso. No a ricibi contesta riba e carta aki, pero directiva di e scol a yama e mayornan pa un reunión.

Según e abogadonan e scol por a exigi c u ta wanta e cabey y tene limpi, pero a prefera di tuma medida drástico. E abogadonan a mustra cu cabey largo no ta stroba e orden ni tampoco ta stroba nan capacidad pa studia.

Abogadonan ta haya cu a base di discriminación a perhudica e estudantenan y tambe a viola nos constitución na unda cu esaki ta papia cu no por discrimina y cu tur hende mester wordo trata cu igualdad.