Diario Online

Joran van der Sloot ta admiti extorsion

Publication: Tuesday, 7 September 2010. Categoria: General

E no ta nenga mas di a asesina Stephany Flores
ORANJESTAD(AAN)– Informacion for di Lima ta indica cu Joran van der Sloot a admiti cu el a comete extorsion contra famia di Natalee Holloway. “Mi kier a pompa famia di Natalee”, Joran ta bisa den un entrevista exclusivo cu Telegraaf. “E mayornan di Natalee tin 5 aña caba ta hasi mi bida miserable. Durante e entrevista cu a tuma lugar den e cel di prison Castro Castro pa Peru, Joran ta admiti cu el a tuma placa di famia Holloway, a cambio di informacion riba e lugar unda nan lo por haya curpa di Natalee.
Despues cu e famia atravez di un abogado a paga 25.000 dollar di adelanto, van der Sloot a bisa nan un lugar unda nan por haya e curpa y e mes a bula bay Peru. Autoridadnan na Aruba a busca na e lugar unda cu Joran a bisa cu e curpa ta dera, pero nada a wordo haya.

Joran a bisa cu curpa di Natalee tabata dera bao di fundeshi di un cas cerca di Oranjestad, pero despues a resulta cu e cas ey na 2005 durante e tempo cu Natalee a desaparece, no tabata construi ainda.

“Door cu nan tabata hasi mi bida miserable, mi a dicidi di hasi loke mi a hasi y awor mi ta lamenta esaki”, segun e Hulandes. “Mi ta verwacht di keda den prison di Peru pa basta tempo”, segun Joran.

Durante e parti die entrevista cu telegraaf a pone riba su website, Joran ta bisa cu e ta yama su mama 1 biaha pa siman.

E periodista a puntre con su mama ta sinti y el a bisa cu e mama no ta sinti su mes mucho bon.
Pa loke ta contacto cu su ruman hombernan, Joran a bisa cu ambos no kier contacto cune, pasobra nan ta hopi rabia.

El a bisa cu specialmente e ruman mayor di e dosnan, ta hopi rabia cune. E periodista Hulandes a puntra Joran tambe con e guardianan di e prison ta trate y el a bisa cu nan ta amable y nan ta trate bon.

El a bisa tambe cu e sa duna les di Ingles na algun di nan cu kier siña. Nan ta bin cu nan bukinan na Ingles y e ta yuda nan.

Segun e articulo cu a Sali den telegraaf, Joran no ta nenga mas cu el a asesina Stephany Flores.
Con exactamente tur cos a sosode e no a bisa si. Den e entrevista Joran a bisa cu e ta bay responsabiliza su mes pa e asesinato, dilanti e huez Peruano.