Mester determina si e regla na EPB ta algo nobo
Segun Minister di Enseñanza,
of si e tabata existi hopi tempo caba
ORANJESTAD(AAN): Diaranzon DIARIO a entrevista Minister di Enseñanza Arthur Dowers, tocante e asunto di prohibicion di mucha cu cabey largo pa drenta school di EPB. Segun e Minister, for di prome dia cu e situacion a surgi, su ministerio a tuma contacto cu EPB pa haya sa kico ta pasando na e school aki. E mandatario a splica cu e school ta wordo dirigi pa Stichting EPB, mientras cu Gobierno y SKOA ta representa den e stichting aki.
E maneho cu ta wordo hiba ta un maneho independiente, pero e ta un maneho unda cu mester tene cuenta toch cu e sentimentonan cu ta biba den comunidad, como kiera cu toch e ta keda un school di Gobierno.
Esaki segun Dowers, kende a bisa tambe cu el a manda pidi miembronan di directiva pa informacion, pero e informacion no a drenta na e forma mas eficiente. Sinembargo na momento di e entrevista, e mandatario a bisa cu algun rato despues e lo bay den un reunion di urgencia cu e directiva, pa combersa riba e situacion cu a surgi.
Minister Dowers a bisa cu e ta kere cu e school tin e libertad di stipula regla den e school y cu e ta un di e Ministernan cu gusta pa cos cana segun regla. Cos mester bay segun regla, pero e mester bay semper den bin palabracion cu otro, pasobra na final di dia mester sirbi un interes general y interes di e hobennan, cu ta den e sistema educacional.
“Mi no ta contento si cu e situacion y nos mester combersa pa yega na un solucion, pasobra tur mucha mester ta bek na school”.
Esaki segun Dowers, kende a sigui bisa cu e muchanan mester yega na un diploma y awor nan ta perdiendo tempo valioso.
Ta importante den e caso aki pa haya sa si e regla aki ta algo nobo cu e studiante no tabata na altura di dje of si e ta algo cu ta existi hopi tempo caba.
