Minister Benny Sevinger felicitando Leo Vrolijk y su coleganan
“Prensa tin un trabao importante y pueblo tin derecho di haya informacion””
ORANJESTAD (AAN): Un par di aña caba Leo Vrolijk ta organizando un exposicion di potretnan cu a worde saca door di su coleganan di prensa. E aña aki e exposicion “ E lens di mi wowo” a worde dedica na e legendario Janchi Tromp, kende pa hopi aña a traha den prensa y tabata un comentarista di taya cu semper tabatin su observacionnan critico. Despues cu Janchi Tromp cortando e sinta a habri e exposicion oficialmente e bishitantenan a drenta pa pasa mira e potretnan cu a capta atencion di e wowo di e fotografo.
Di parti di gobierno Minister Benny Sevinger a duna acto di presencia. Den un discurso cortico e mandatario a cuminsa na manda palabranan di elogio pa Leo Vrolijk, kende ta esun cu a bin cu e iniciativa bunita aki cu poco poco ta hayando su lugar mereci den comunidad.
Minister a bisa ta sinti su mes orguyoso di mira fotografonan di generacionnan pasa para eyden cu a pasa e “lens” pa e generacion nobo. El a sigui comenta cu despues di e tres podernan conoci den un pais democratico, prensa inoficialmente ta bin na di cuater lugar cu den tur pais ta hunga un rol di hopi importancia.
Sevinger ta bisa cu ultimo tempo si nos mira rond den nos regio mes con nos por constata cu mas y mas e trabao di prensa ta bou presion. “Libertad di expresion”, un frase cu nos tur ta usa semper cu ta indica cu e ciudadano por expresa su mes libremente atraves di prensa ta hayando su mes confronta cu conflicto den nos propio region aki, Sevinger a bisa su audiencia.
Minister a conta con el a mira con na Mexico periodista y fotografonan a worde asesina ultimo lunanan y pa conscientisa e hendenan a bin cu un programa special na Merca na unda ta dunando “asilo politico”, pasobra na nan pais nan y nan famia ta worde persigui y mata door di narcotraficantenan pa motibo di no ta keda silencioso.
Un situacion masha di lamenta. Sevinger: “Na Aruba nos tin libertad di prensa. Nos tin libertad di expresion den tur su facetanan”. Den mesun rosea Minister a bisa tambe cu nos ta tene nos mes na reglanan di etica y norma cu ta conta den e trabao di periodismo y pa nos tur cu ta forma parti di pais Aruba. Sin duda cu ora bo tin cierto libertad cu esaki ta bay man den man cu responsabilidadnan.
Minister Sevinger a corda con algun aña pasa – despues di 9/11 – cu tabatin un discusion unda ta pone e balansa entre libertad di expresion y libertad di tin informacion y con ta evita pa esaki worde usa den forma negativo.
E discusion aki ainda ta andando y nos lo mester brainstorm riba dje y busca e balansa. Prome cu 9/11 nos no tabata confronta den nos bida diario cu atentadonan den otro paisnan di mundo. Ta te después di loke a sosode na Merca, nos bida diario a cambia. door di e derecho cu nos tur tin pa haya informacion, e atakenan terorista ta bira conoci pa nos aki banda tambe. Esaki ta haci si cu teroristanan ta malusa e derecho aki door di terorisa henter mundo. Y aki ta unda e balansa mester worde busca.
Mester evalua cua noticia ta worde treci dilanti y di tal forma cu e no tin un impacto negativo riba resto di mundo. Noticia ta core rapido. Awendia tin Internet, cellular y otro atributonan tecnologico moderno y si algo sosode den menos di algun seconde ya – casi – henter mundo ta na altura di loke a sosode.
Prensa tin un trabao importante y pueblo tin derecho di haya informacion. “Gobierno ta haya e trabao di prensa importante. Pesey mes cu nos mester para keto reflexiona pa mira si nos tur ta cumpli cu e reglanan di norma y etica cu ta bin cu e trabao cu prensa ta haci. Gobierno kier a felicita Leo y tur su amigonan presente pa e exposicion aki y gobierno ta spera cu e lo sigui crece pa bira algo permanente”, asina Sevinger a finalisa bisando.
