El a bolbe despues di un descanso bon mereci… pero,
ORANJESTAD(AAN):Hopi hende por a corda con prome y durante campaña electoral 2009 tabata parce cu “stress” tabata tin e ex–prome minister, Nel Oduber, hopi influencia. Expresionnan cu el a haci e tempo ey tabata legendario y na e mesun tempo chistoso. Pero pa un prome minister e no tabata pas. Aki por corda con el a referi na cuerpo policial pa un grupo di padvinder of c u ta hungador di domino bou palo. Pesey mes, hopi siguidor politico, a pensa c u ta na su lugar pa e politico di 30 y pico aña den politica, manera cu e mes ta referi na su mes, merece un bon descanso.
Ayera, despues di algun luna di descanso, hopi a spera un Nel Oduber envigorisa y cu forza pa sigui su trabao. Pero parce cu e “stress” ainda tine domina.
Ni un cuarto di ora ariba tribuna di parlamento di Aruba, Sr. Oduber a cuminsa grita, insulta y hisa man na laira. Hopi a kere cu su hendenan lo siguie, pero tur hende a keda sinta keto den nan stul. Pa mas cu el a purba hala atencion y atrobe insulta Polisnan presente, ningun hende a dun’e mucho atencion.
Polisnan a dicidi di cuminsa di bay den direccion di e ex-prome minister pa nan haya un mihor bista como precaucion. Nel Oduber a kere cu seguramente nan a bay areste of sake for di e edificio.
Pa su asombro, e Polisnan a pasa bay banda di dje y el a keda sperando pa nan pone man ariba dje. Hopi di esnan presente tabata comenta cu e lo ta buscando un motibo pa lanta su hendenan na su fabor. Segun informenan, tin un problema pa e politico di basta aña aki na caminda. Parce cu tin hopi presion pa e sede su posicion di lider na otro persona.
Pero Nel Oduber aparentemente no kier tende cu otro por bira lider por lo printo di e partido cu Betico Croes a funda.
