Por pone gerencia, hunta di supervision y ex-minister responsabel penalmente pa e fondo di APFA
Empleadonan publico kier sa si
ORANJESTAD (AAN)* Dialuna durante e reunion cu miembro y empleadonan publico en general cu TOPA a tene, preguntanan cu a bin dilanti ta con leu huridicamente por pone gerencia y hunta di supervision mas e ex-minister di Finanzas responsabel penalmente. Esaki a base di e rapport di Banco Central cu ariba cada pagina ta ilustra cu NO tabatin ningun tipo di maneho den APFA y na unda cu mas di mil miyon Florin di e trahadornan a worde gegambled sin cu tabatin conocemento of expertise den haci inversion y mas pio sin tene cuenta di e risico cu e placa di e trahadornan cu a traha duro durante añanan largo a somenta manera salo den awa.
Y awo kier pasa e trahadornan un fastball cu tan an tin cu carga pa e consecuencianan di e mal maneho aki, pues segun e trahadornan sumamente indigna mester por pone esnan culpable penalmente responsabel pa cu e mal maneho aki.
Y esaki no solamente por keda pa esnan cu tey awor aki sino tambe tur esnan cu desde 2001 a permiti e debacle aki den APFA sin cu ningun di a duna señal di e mal maneho aki. E ex-minister di Finanzas no a laga haci ningun tipo di control mirando cu e fondo aki ta cay directamente bao di su responsabilidad.
Loke ta e caso actualmente ta cu tur esnan cu a paga e maximum di 30 aña of mas y esnan cu ta forma parti di e areglo nobo ta core peliger pa keda sin haya nan pensioen.
E empleadonan public sumamente rabia y cu ta hopi preocupa ta cu nan ta rabia cu e sistema di franchise den AOV. Den esaki ya caba sinditato TOPA a manda carta cu ultimatum pa gobierno pa entrante 1 di Oktober revoca e protocol bilateral aki. Ya caba ta coleccionando firma di tur empleado public cu e fin di tene un manifestacion pa urgi Minister Presidente pa deshaci di e protocol aki.
Pa loke ta e aumento di prima di AZV na unda cu den e protocol aki ta pone cu e clase trahador ta paga 1% y e gremio commercial e otro 1%, esaki segun e trahadornan public gobierno y gremio commercial kier tuma nan haci comokiera cu na final di dia ta e clase trahador lo paga e aumento di 2% aki pa motibo cu lo hinca esaki den prijs y e clase trahador ta e consumidor di mas grandi.
