SIAD lo cuminza parti carta di retribucion y/of cobranza di Inkomstenbeslating 2007 e luna aki
Meverly Romano PR a confirma na DIARIO:
Pa e aña aki y otro aña ainda ta keda papia di un atraso!
ORANJESTAD (AAN): Mirando cu tur aña tin hopi keho relaciona cu e placa cu pueblo kier haya for di Servicio di Impuesto pa loke ta Inkomstenbelasting, DIARIO a tene un entrevista cu Meverly Romano, Relacionista Publico di SIAD pa asina tene un bista riba e situacion y con esaki ta canando actualmente. Señora Romano a splica cu SIAD tin un plan di accion e aña aki. El a splica tambe e motibonan di e atraso pa loke ta e entrega di e placa di retribucion despues di aña 2005.
El a confirma na prome lugar cu e siman aki nan a cuminza cu 2007 teniendo prioridad riba 2005 y 2006. Mayoria di hende a haya nan aanslag di 2005, mientras cu pa loke ta 2006, esey ta casi completo.
Pa loke ta 2005 tin 91.4% di e declaracionnan regla caba. Di 2006 a yega na 71.6% cu ta regla.
Meverly Romano a agrega cu 2006 ta bayendo basta rapido y pesey gerencia a duna ok pa cuminza aworaki cu 2007.
E relacionista publico di SIAD a confirma cu aki dos pa tres siman e prome clientenan lo cuminza haya nan retribucion/cobranza di 2007. Esnan cu tin cu haya placa back lo ricibi nan placa riba nan cuenta di banco.
Ta calcula cu si tur cos bay bon cu 2007 hasta tin un chens cu SIAD lo por cuminza cu 2008 fin di e aña aki ainda, a bisa. Pero conforme e simannan ta pasa, lo wak con lihe e proceso ta bay.
E procesamento na e momentonan aki ta bayendo segun plan. Na 2011 lo traha principalmente riba 2008 y 2009. Mester corda cu aworaki SIAD ta bezig recibiendo 31.950 declaracion cu nan a saca pa loke ta 2009. Kiermen cu pa otro aña tin un cantidad grandi pa procesa di loke nan lo haya back.
Na mesun momento, otro aña ta bay cuminza otorga e declaracion di Inkomstenbelasting di 2010. Si nan logra procesa e cobranzanan di 2008 y 2009 otro aña, pa ora cu nan otorga 2010, por bisa cu mas den fin di aña cu SIAD lo por ta cla pa procesa 2010 tambe.
Segun Sra. Romano, si nan yega asina leu por bisa cu e ora ey a elimina e atraso sino ta completo, casi completamente. Mientrastanto, pa e aña aki ainda y durante otro aña lo keda papia di un atraso, a subraya.
