Spera Gobierno mantene bon relacion den Reino manera e pueblo kier
Emily de Jong Elhage:
ORANJESTAD (AAN): Prome minister di Antias Emily de Jong Elhage tabata presente tambe den e Conseho di Reino na Hulanda y tabata masha contento como politico di a forma parti di un ocasion asina importante, den loke tabata e ultimo reunion di e Constelacion di Reino manera cu e ta aworaki. A splica cu el a pasa tur e leynan cu a worde aproba ultimo aki na Aruba y e ultimo leynan cu tabata falta pa Curaçao. E politico di Curaçao a splica cu na Hulanda tabata tin masha aprecio cu apesar cu PAR no ta forma parti di e coalicion nobo cu sosten di 11 politico, toch PAR a vota na fabor di e cambionan cu mester tuma luga.
E prome minister saliente a splica cu di e coalicion nobo forma, seis di e miembronan a vota contra e cambionan y cinco a vota na fabor. PAR di su banda a sigui vota na fabor di e cambionan, manera semper nan a haci.
“Nos a bin ta sirbi pueblo y nos a bin pa negosha pa cumpli cu e deseo di e pueblo pa ta pais autonomo den Reino. Esaki a worde hopi aprecia den e reunion den Reunion pasobra ta hopi trabao a worde haci den e ultimo cuater aña y mei den Reino,” señora De Jong Elhage a bisa.
El a elogia Mike Eman pasobra sin e cambio di Statuut aproba door di Aruba y sin e cooperacion di PAR, Curaçao ni Sint Maarten lo no por a haya e status autonomo cu nan ta desea. Y PAR a coopera pasobra esey ta e confianza cu pueblo a duna nan tur e añanan pa cumpli cu nan deseo.
Durante e entrevista cu Emily de Jong Elhage prome minister di Antiyas a mustre cu ta sinti un Curacao dividi e momentonan aki. Tempo cu Aruba a bringa pa su status aparte tambe e pais tabata parcialmente dividi. Awo cu tempo a pasa ta visibel cu Aruba a scoge e caminda corecto como pais autonomo.
E politico ta admiti e division pero no ta bay haci politica cu algo asina fundamental pa e pueblo. E ta spera cu awor esnan cu ta contra otro y awor ta forma un coalicion nobo, sigui traha pa deseo di pueblo.
E politico ta contento y orguyoso di a logra drecha e relacionnan den Reino for di momento cu el a asumi e puesto di Minister President. E relacion a worde drecha y unda cu e por haci mas, e lo hacie. E ta spera cu e Gobierno nobo percura pa mantene e bon relacion, pasobra esey ta loke pueblo kier. E pueblo a vota cu nan kier keda den Reino.
Den e reunion di Conseho di Ministro di Reino a keda aproba como Gobernador di Curaçao Frits Goedgedrag.
Rene Naar
Si pueblo a bai tras di Nel y Booshi y su roversbende, ta cu ki cara Aruba lo cana den Antiyas awor, ademas nan a pone un Arubiano como nan gobernador. Elogio na e cambio di satuut aproba pa Aruba y Par cu Curacao y St.Maarten por hanja nan status autonomo, nos a scapa otro bez di un berguenza inspira pa protagonista numero uno Nel y numero Dos Booshi. Corda con Balkenende a cataloganan den kamer ” mafiaregering “.