STARBUCKS a habri segundo sucursal
Awor den lobby di Renaissance Marina Tower
ORANJESTAD (AAN): Un sucursal nobo di Starbucks a habri su portanan na Aruba! Despues di a goza di un popularidad inmenso den pueblo, un outlet nobo a caba di keda inaugura, y e biaha aki e ta worde presenta den un forma mas chick, y tropical!
Den e lobby di Renaissance Marina Tower, Starbucks a habri cu un decor sumamente yamativo, incluyendo uso extenso di muraya di palo, como tambe un plafond abstract, combina cu algun Ceiling-Fan masha artistico.
Tur dia for di 7’or di mainta caba, e aroma unico di coffie di Starbucks ta plama den e lobby pa asina duna tur turista y localnan, un “saludo di mainta”.
E lugar nobo aki ta net na e ‘boat landing’, unda e boto di Renaissance Island ta subi y baha huespednan.
Un diseño hopi espacioso mes a worde usa pa e Starbucks nobo aki, cu ta ofrece mesun prijs y bon servicio cu e otro sucursal.
Ehecutivonan di mercadeo di Renaissance Mall, esta Zugheila hunto cu Edalitza y Tirzane a mustra cu nan ta orguyoso cu presencia di e famoso coffeehouse aki mey-mey di Mall.
DIARIO a nota cu e turistanan tambe ta feliz cune, como cu constantemente tin cliente para den rij pa busca e creaccionnan celestial cu Starbucks a sa di malcria Aruba caba cune.
Ademas di e servicio, nan a crea un espacio sumamente atractivo pa bo sinta, dal bo coffee, y lesa bo DIARIO of surf riba Internet.
Mas cu claro, e adicion di Starbucks den e lobby, combina cu e decor unico, ta eleva e area aki aun mas y por a mira hasta turista ta saca foto di dje.
Tur dia nan ta cera pa 9’or di anochi, cu excepcion di Diadomingo, ora cu na ta cera pa 2’or di atardi.
DIARIO ta felicita gerencia cu e expansion di Starbucks na Aruba.
