Home General Ta exigi examen di naturalisacion tanto na Papiamento como na Hulandes

Ta exigi examen di naturalisacion tanto na Papiamento como na Hulandes

108
0
SHARE
- Advertisement -

Entrante 1 di januari 2011
ORANJESTAD (AAN): Entrante 1 di Januari 2011 stranheronan cu ta desea di haci un peticion pa naturalisacion na Aruba, lo mester pasa examen tanto na papiamento como na hulandes.
Pa por entrega un peticion pa obtene e nacionalidad hulandes pa medio di naturalizacion, candidatonan mester pasa un examen di naturalizacion prome. Na Aruba e instancia encarga cu e examen ta Examenbureau. Den e situacion actual ta permiti e candidato pa scoge si e ta pasa e examen na papiamento of na hulandes.
Entrante dia prome di januari 2011 candidatonan na Aruba lo mester pasa e examen tanto na papiamento como na hulandes. E candidato lo mester contesta e parti di e examen cu tin pregunta tocante comunidad arubiano y asuntonan constitucional na papiamento.

Otro parti di e examen ta test e candidato su dominacion di e idioma papiamento. Finalmente tin e parti cual ta test e candidato su dominacion di e idioma hulandes. E examen di naturalizacion ta test cuater habilidad di ambos idioma: lesa, scucha, skirbi y papia.

Esaki ta consecuencia di modificacion di e ‘Rijkswet op het Nederlanderschap’. Cu esaki pues, no tin e opcion mas di scohe entre un examen na papiamento of na hulandes. Na su luga, ta pasa e examen den tur dos idioma.

CONDICIONNAN PETICION NATURALISACION
Peticionnan pa naturalisacion, na Aruba mester worde entrega na Gabinete di Gobernador. Prome cu haci esey, candidatonan mester a pasa e examen di naturalizacion na Examenbureau di Aruba. Candidatonan cu a pasa e examen cu exito ta ricibi un certificado di Examenbureau. Esaki ta e asina yama ‘Certificaat Naturalisatietoets’.

Mester presenta e certificado na momento cu entrega e peticion pa naturalizacion na Gabinete di Gobernador. Ademas e candidatonan mester cumpli cu algun otro condicion general y specifico. En particular ta importante cu candidatonan ta cumpli cu e exigencia di un estadia continuo na Aruba, a base di un permiso di estadia.

En general nan mester a biba por lo menos 5 aña tras di otro na Aruba. Pa un candidato cu ta casa cu un Hulandes, ta conta cu e mester ta casa y ta biba hunto pa un periodo di 3 aña tras di otro. Ademas e candidato ey mester tin un derecho di estadia valido na momento di entrega di e peticion pa naturalizacion y tambe mas despues, na momento cu na Hulanda ta dicidi riba e peticion di naturalizacion.

Pa mas informacion tocante condicionnan di naturalizacion ta referi na website di Gabinete di Gobernador: www.kabga.aw, na e rubrica Asuntonan Consular.

ULTIMO CHENS PA EXAMEN DEN UN IDIOMA
Solamente e aña aki (2010) ainda lo por entrega peticionnan pa naturalizacion a base di e examen di naturalizacion, cual a pasa solamente na papiamento of solamente na hulandes.
Ta conseha candidatonan cu anteriormente a pasa e examen, pero cu no a slaag pa un of mas componente y tambe candidatonan cu pa prome biaha ta desea di pasa e examen, pa tuma contacto cu Examenbureau.

E aña aki solamente un biaha mas, Examenbureau lo ofrece e oportunidad pa pasa e examen completamente of parcialmente (ripiticion) na papiamento; Esaki ta planea pa tuma luga na October 2010.

ENTREGA PETICION DI NATURALIZACION
Esnan cu pasa e ultimo examen (esun solamente na papiamento of solamente na hulandes) cu exito y cu a ricibi e certificado, mester entrega un peticion pa naturalizacion na Gabinete di Gobernador pa mas tarda 30 di December 2010. Manera menciona, ta importante si cu ta cumpli cu e demas condicionnan di naturalizacion.

Ta conseha candidatonan cu tin un certificado di examen di naturalizacion caba y cu ta cumpli cu e demas exigencianan, pa entrega un peticion mas pronto posibel na Gabinete di Gobernador. Por haci un cita cu Gabinete di Gobernador via su website: www.kabga.aw, na e rubrica Asuntonan Consular.

- Advertisement -

DUNA COMENTARIO

Please enter your comment!
Please enter your name here