Diario Online

Trahadornan di KIA cu accion di protesta

Publication: Wednesday, 29 September 2010. Categoria: General

“Gobierno no ta dunando atencion”, segun Marlin di SEPPA:
ORANJESTAD (AAN): Na KIA tabata tin un protesta di dos ora mirando cu e trahadornan ta rabia pa diferente motibo. E gobierno no ta dunando nan atencion. Nan ta wardando basta tempo caba riba contesta di minister di husticia Arthur Dowers. Awor a bay over na un protesta di 2 ora. Tres diferente punto di preocupacion e trahadornan tin. Den entrevista cu Edmundo Marlin vice presidente di SEPPA el a splica un tiki mas riba e protesta cu tabata tin. Sr. Marlin a bisa cu e trahadornan ta rabia aworaki despues cu nan a sinta na mesa cu minister na dos ocasion y cu su coordinadora. Esaki ta tumando lugar desde Februari e aña aki, a splica.
Tin cierto palabracionnan cu a wordo haci pa cumpli cune y esey no a wordo haci.
E tres motibonan pa locual e trahadornan ta rabia ta e parti di e opleiding cu e trahadornan mester di dje pa haya nan bevordering.

E di dos ta e reorganizacion cu tabata andando desde 2004, pero pa motibo di un cambio di gobierno, gobierno mester dicidi si nan ta bay hacie of no.

Pendiente di esey, a laga sa, tin hende a wordo tuma den servicio. Esaki ta nifica cu e hendenan aki ta sin funcion. Ta trata di 6 pa 7 empleado cu no tin funcion.

Na di tres lugar a bisa cu e trahadornan ta rabia pa loke ta e parti di maneho cu ta wordo hiba den KIA. Esaki ta frustra e trahadornan hopi pasobra nan ta mira cu cosnan ta wordo papia, pero no tin accion, a señala.

Segun Marlin, a wordo papia basta y e trahadornan no ta mira ni un movecion ta tuma lugar na KIA. E accion a tuma lugar pa mustra gobierno, particularmente Minister di Husticia, pa pone mas atencion y pa yega na e palabracion cu tabata tin pa keda cla cu e asuntonan di KIA, a indica.

Aworaki un di e “bottleneck” ta cu tanten cu no tin opleiding, ningun di e trahadornan por haya promocion. E opleiding aki ta para desde aña pasa.

E trahadornan ta basta rabia pasobra nan ta sinti cu SEPPA ta bisa nan cu nan a palabra, pero patras di e palabracion no ta mira nada concreto, Edmundo Marlin a expresa.

Un luna of ta un luna y mey pasa ainda SEPPA a yega den contacto cu e consehero di e mandatario di husticia riba e problemanan cu tin. Segun Edmundo Marlin e consehero a informa SEPPA cu minister a institui un comision di dos hende pa haci un doorlichting na KIA y su maneho y reorganizacion.

Te awe e sindicato no a tende nada mas di esaki segun Marlin. Esaki tin e trahadornan basta preocupa, principalmente esnan cu no tin funcion.

Nan a bisa gobierno cu mester traha riba e tres aspecto aki cu a ser menciona. Pa loke ta e opleiding a señala cu e trahadornan kier cuminza cune e aña aki. No otro aña. Tin algun trahador cu falta un vak so y nan tabata bezig cune na 2008. Pa motibo cu a para e opleiding aki ningun hende mas por haya e vak ey, a bisa.

Den cierto manera ta perhudicando e personal aki cu mester yega na remarca pa por haya nan promocion, a manifesta.