Tur cos ta practicamente cla pa cambio den Reino
Ank Bijleveld:
ORANJESTAD (AAN): Secretario di Estado Ank Bijleveld tambe tabata presente den e reunion di Conseho di Ministro di Reino y a bisa cu e meta di e reunion aki tabata pa wak cu tur cos ta cla pa e reunion di Tweede Kamer y Conferencia di Mesa Rondo, riba e cambionan cu lo drenta na vigor den Reino dia 10 di october, 2010. E debate den Tweede Kamer a tuma luga ayera tambe. E mandatario aki tambe a sali cu un cara alegre for di e reunion, di prueba con tur cos a bay den dicho reunion.
Pero tambe el a bisa cu esaki tabata un bon reunion unda a recorda con Aruba a logra su status aparte y awe Sint Maarten cu Curacao tambe bayendo den e mesun direccion cu Aruba a tuma.
E mandatario ta bisa cu ta importante pa sinta y mira con ta bay stipula e futuro relacionnan denter di Reino, algo cu ta masha importante.
Señora Bijleveld a bisa cu e isla di Aruba a dal pasonan grandi e ultimo añanan riba tereno di bon gobernacion, bon maneho finanza, y esaki ta loke e paisnan nobo mester bay haci tambe.
E mandatario a bisa despues di e reunion di Conseho di Ministro di Reino, por bisa cu practicamente tur cos ta cla pa introduccion di e cambio den Reino proximamente.
