Turista di Albania a bira razo na carrental
ORANJESTAD.(AAN):Por poco situacion a sali for di man ora cu un homber no tabata di acuerdo cu a kita un suma di placa for di su credit card. Tabata diamars atardi alrededor di 4’or cu patruya di Noord a wordo dirigi na un carrental situa na Bubali pa intermediacion. E patruya cu ta na caminda a ricibi mensahe di central pa e bay cu rapidez na e carrental ya cu un turista a bay laira cu gerente di e compania.
Den un fraccion patruya a presenta y pa cuminsa polis a papia cu e homber di inicialnan B.G. di 29 aña naci na Albaña.
E homber bishitante ta hospeda como turista na un low rise hotel. Segun version di B.G. un par di dia prome (5 dia) e tabata envolvi den un accident di trafico cu e Vwagen 1409 di e carrental.
E Vwagen a sufri bastante daño, awor el a bin descubri cu e compania di carrental a kita 6 mil dollar for di su creditcard.
Consecuentemente el a bira razo riba nan. El a bisa polis cu e no ta di acuerdo cu gerencia di e carrental pa a pone responsabel di e daño.
Polis despues di e a atende B.G., a scucha e otro banda di medaya. Segun declaracion di gerencia di e carrental, nan a conseha e bishitante pa sera un seguro, pa colmo ora di e accident a tuma lugar e tata di B.G. tabata tras di wiel y e no ta registra como tal, pa cual B.G. ta responsabel.
Despues cu polis a scucha e gerente, polis a splica B.G. e asunto cu aki ta trata di caso civil. E ora ey B.G. a calma, el a bisa di ta biba na Merca y e ta bay tuma accion civil. Finalmente, e homber a kibra e contrato dilanti polis.
