Un grupo chikito di sostenedornan di MEP a crea disturbio atrobe den Parlamento di Aruba
Manera ta birando custumber:
ORANJESTAD (AAN): Aruba ta por ta masha bergonza un biaha mas di e manera con partido MEP ta instigando su hendenan pa asina por crea pandemonio durante di reunionnan publico den Parlamento di Aruba. Segun informenan cu nos a ricibi y tambe basa ariba testimonio ocular, varios di e sostenedornan di e partido tabata aparentemente (pa falta di un mihor palabra) intoxica. Parce cu sr. Nel Oduber ta decidido pa cueste loke cueste causa disturbionan pa e por hustifica su liderazgo den partido MEP. Parce cu partido MEP ainda ta den gara di e persona aki cu ta kere cu e mihor manera pa ciudadanonan Arubiano anda cu otro ta bringando y den desacuerdo constante.
Cu esaki e ta purbando, segun informantenan pa crea un polarisacion entre Arubianonan pa asina e bira evidente cu ningun otro persona por bira lider di e partido geel. Partido MEP a pasa den un eleccion den cua pueblo a mustra desconfianza di pueblo pa e mesun actitud pro-violencia aki.
Violencia ta conduci na decadencia di nos sociedad y no ta corecto den wowo di mayoría di pueblo pa un ex-minister por ta instiga su siguidornan di e manera baho ey.
Ta parce cu MEP ta creando un tipo di Apartheid Arubiano den e siglo aki. E gritamento constante di e siguidornan di MEP ta mustra cu ta convenci cu nan so ta Arubiano.
Cualke hende cu no ta para banda di nan, automaticamente ta triador, entregista of simplemente no Arubiano. Awor a para bira cu Nel Oduber tin monopolio pa bisa ken ta of no ta Arubiano.
Polarisacion ta algo cu no ta combini nos pais.
Aruba no ta un pais intolerante y menos ainda violento. No por ta asina cu kier controla pensamento di otronan considerando nan Arubiano di un nivel abou, djis pasobra nan tin opinion, color of aspecto diferente na loke abo kier monopolisa.
Aruba ta un isla cu ta orguyoso di e strea ariba su bandera. E significado di e strea a bay totalmente perdi pa algun sostenedornan MEP.
