Baby na caminda y futuro tata di 21 aña a haya 2 aña di castigo
Abogado a mustra cu e persona cu su cliente a duna e informacion pa planea e atraco, no a ni wordo acusa
ORANJESTAD(AAN): Diabierna Josimar J.C di 21 aña y Milton A.R di 38 aña a presenta dilanti di huez na corte di husticia como sospechoso. J.J.C a wordo acusa di a participa of di tin complicidad na un atraco riba Kentucky riba 30 di Maart 2010, unda cu a bay cu un suma di placa di 3800 florin. E atracadornan a bin cu cara tapa y cu machete y tubo di hero den man.
M.A.R a wordo acusa di ladronicia di auto, of di tin posesion di un auto di cual e tabata sa cu e auto tabata horta riba 25 di April 2005.
Huez a cuminza cu e parti di e ladronicia di auto. Ta asina cu despues cu propietario di e Nissan a entrega keho, polis tabata busca e auto. Na dado momento polis tabata hasi control y M. kende tabata maneha e auto horta a dicidi di core bay pa polis.
Polis a core su tras y M. a perde control di stuur y a dal cu e auto. Despues el a Sali for di auto y a core bay pa polis. Polis a los un tiro di advertencia y a logra detene e sospechoso. E sospechoso mes a declara cu el a pidi lift y e chofer di e auto tabata hala cocaina y bebe alcohol y a pidie si e kier a maneha e auto.
M. a dicidi di core e auto y segun M., ora el a wak cu polis tabata hasi control, e no kier a para, pasobra e no tin rijbewijs y e tin algun boet cu e tin cu paga. Pesey el a core bay pa polis.
Polis a nota cu e auto no tabata tin e number corecto riba dje y ora cu nan a bay listra na cas di e sospechoso, nan a haya e number original di e auto.
Huez a puntra e sospechoso con e number a yega na su cas, si manera el a bisa e no a horta e auto.
M. no tabata tin un bon splicacion pa esaki. El a bisa huez si cu ora polis a detene, nan a maltrate y cu el a haya asina tanto dolor, cu despues el a wordo hiba pa Eerste Hulp.
Como cu huez no a mira nada di esaki menciona den e dossier di e caso aki, el a puntra M. kico docter a constata. E sospechoso a bisa cu e no a haya un rapport di docter, pero cu e ta dispuesto pa duna permiso pa corte obtene e documentacion aki.
Huez a puntra M. si e no tabata sa cu e auto tabata horta y el a bisa cu no. Huez a puntre si e auto tabata tin un yabi regular y el a bisa cu si. Segun huez, J.J.C kende ta amigo di M. a bisa cu un Nissan a wordo uza pa e atraco riba Kentucky, pero M. a bisa cu e no sa di esaki.
Huez a puntra M. si el a entrega un denuncia contra e polisnan cu a maltrate y el a bisa cu no.
El a bisa cu e comisario na warda a menaze di kibra su cachete si e bisa algo y el a haya miedo.
Pa loke ta e caso di atraco riba Kentucky, manager di e lugar a bisa polis cu na momento cu e tabata contando e placa, un persona a drenta cara tapa y cu un tubo di hero den man y a bise cu ta un atraco.
Door cu J.J.C kende ta traha na Kentucky a caba di bay pafo, e manager na prome instancia a pensa cu ta J.C ta hasiendo un joke. Despues un otro homber a drenta cara tapa cu machete.
Nan a coi e placa y a Sali bay na careda.
Ora cu e manager a core bay pafo nan tras, el a wak J.C para masha trankil y el a puntre dicon e no a core pa su seguridad, of pa mustra loke ta pasando y J. a bise cu e no a wak e personanan drenta, pues e no sa kico a sosode.
Huez despues a repasa loke camera di seguridad a constata y e camera a mustra con J. tabata para pafo y a habri e porta di patras pa benta sushi pafo. El a laga e porta riba hak. Despues bo no ta wak e mas pa un rato y despues e grabacion a mustra sombra di hende banda di J..
E grabacion a mustra J. tambe ta uza su celular, pues e tabata den contacto cu hende prome y durante e atraco, mientras cu ora bo ta traha na Kentucky, bo no ta permiti di uza celular durante oranan di trabao.
Mirando loke e camera a constata, J. a wordo deteni como sospechoso. J. mes a declara na polis cu M.A.R cu tabata sinta den corte banda di dje y acusa di horta auto, a puntre diferente biaha cierto informacion relaciona cu e operacion di Kentucky, pasobra e tabata tin mester di placa y kier a comete un atraco.
J. na su turno a puntra cierto informacion por ehempel tocante riba ki dia y ki ora placa ta wordo conta etc. El a bisa M. tambe cu riba un bon dia por tin 10.000 florin den e lugar. Den su declaracion cerca polis el a bisa tambe cu el a duna M. e informacion y riba un anochi tabata tin un persona scondi patras di Kentucky unda J. ta tira sushi afo.
E persona a bin pa atraca e lugar y el a conseha e persona pa bin otro biaha cu un arma, pa asina mustra cu ta na un manera obliga, el a laga e persona drenta e lugar. E declaracion ta mustra tambe cu e persona a bay for di e sitio y segun J., un otro dia el a topa cu M. y dos amigo di M. y nan a sinta traha e plan, unda te hasta J. a pinta un mapa pa mustra unda nan tin cu bay pa coi e placa etc.
Den corte J. a nenga di a hasi esaki. El a bisa cu el a duna informacion solamente na M.
Huez a confronte cu loke tin para den su declaracion y el a bisa cu e no ta compronde Hulandes.
El a bisa cu el a firma e documento, pero e no sa Hulandes.
El a bisa huez cu for di hoben caba el a bay un school di papiamento y despues EPB.
El a bisa cu e no a pinta ningun mapa. Huez a puntra J. na dado momento si el a wordo menaza pa e otro sospechosonan cu a comete e atraco of si e ta sinti su mes menaza.
El a bisa cu e ta sinti cu e y su famia ta menaza. J. a bisa huez tambe cu e ta lamenta loke a sosode.
El a bisa huez cu e kier cambia su bida, mirando tambe e hecho cu su pareha dentro di algun siman ta bay haya yiu.
J. a splica huez tambe cu den KIA el a logra un certificado di waiter y cu su suegro tin trabao pe den construccion ora cu e Sali di KIA. Fiscal a trece dilanti cu e hecho cu a duna tanto informacion na e atracadornan y cu e tabata presente durante e atraco, ta hasie complice di esaki.
Fiscal a bisa si cu e ta tene cuenta cu e hecho cu J. nunca antes a haya problema cu husticia y cu e ta bay bira tata pa prome biaha. Asina mes fiscal a exigi un castigo incondicional, kitando e tempo cu el a sinta caba.
Pa loke ta e caso di M.A.R, fiscal a exigi un castigo di 86 dia, cu ta e dianan cu M. a sinta caba den detencion preventivo. Abogado Zara representando J.C a bisa huez cu ta hopi straño cu su cliente a declara cu el a duna M. e informacion, e atraco a wordo cometi, pero M. no a wordo acusa di nada.
Segun Zara, si esun cu a haya e informacion pa comete e atraco mes no a wordo acusa, con por acusa e persona cu a duna e informacion. Fiscal a splica cu tabata tin solamente e declaracion di J.C contra M. y e hecho cu nan tabata tin contacto telefonico cu otro prome y durante e atraco, pero cu esaki no tabata suficiente pa traha un caso contra M. pa e atraco.
Huez na dado momento a bisa cu e no ta bay tuma un decision ainda den e caso di ladronicia di auto. El a bisa cu e ta bay pidi landsrecherche pa hasi un investigacion riba supuesto maltrato riba M., pa despues e determina kico ta bay sosode.
Pa loke ta J.C, huez a bisa cu e ta tene cuenta cu e hecho cu e ta bay bira tata pa prome biaha y cu e ta ‘first offender’. Sinembargo huez a bisa tambe cu un atraco ta algo hopi serio, mirando e trauma tambe cu e victimanan ta keda cune.
E huez a bisa tambe cu normalmente pa un atraco castigonan di 3 of 4 aña ta normal.
Den e caso aki door cu el a tene cuenta cu e circunstancianan personal di e acusado el a bay di acuerdo cu exigencia di fiscal y a duna J.C un castigo di 2 aña.
E famia di e acusado claramente tabata pensa cu lo tabata bon pa J.C apela, pero J.C a bisa huez mesora cu e no ta bay apela.
