Home Politica Beslag riba Bushiri no ta afecta Minister of Gobierno solamente, sino nos...

Beslag riba Bushiri no ta afecta Minister of Gobierno solamente, sino nos tur

0
0
SHARE
- Advertisement -

avpotmarPa motibo di agenda politico/financiero ta perhudica pueblo di Aruba
ORANJESTAD(AAN): Durante conferencia di prensa di Minister Otmar Oduber tocante e acto falso di pone beslag riba Bushiri Hotel, net awor faltando algun dia pa concretiza e acuerdo pa bin cu un Hilton di 5 strea eynan, el a splica e desaroyo di e proceso aki. Na december ultimo a manda un carta pa e grupo cu e tempo ey Gobierno anterior a duna un opcion pa por tuma Bushiri Hotel over. E opcion aki a worde duna 20 di juli 2007, es decir, mas di 3 aña pasa caminda cu nan mester a cumpli cu cierto requisitonan pa nan por tuma e hotel over.


Mientras tanto pueblo di Aruba ta pagando pa aña casi 400 mil Florin na security, hereda for di Gobierno anterior. Esey kiermen cu den 5 aña a paga na seguridad so, pa cuida un ruina, 2 miyon Florin.

E condicionnan cu Gobierno anterior a pone pa e grupo Spaño cumpli cu nan ta: paga un erfpacht canon di 152,606 mas 71,501 di e tereno adicional cu Gobierno anterior kier a dunanan, cu ta inclui parti di e tereno di waf; tambe nan mester a paga 10 miyon 100 mil Dollar pa adqusicion di e propiedad di pueblo di Aruba, cual mester a bay Parlamento pa haya aprobacion; tambe mester a pone un performance bond di 70 miyon Dollar. E di cuatro condicion poni pa Gobierno anterior tabata cu nan mester a cumpli cu esakinan den 30 dia.

Despues di cambio di Gobierno, e grupo aki a entrega un lista di documentonan, corespondencia cu tabatin cu e Gobierno anterior. Akiden por a mira cu desde 2008 no tabatin dialogonan mas cu Gobierno.

Mirando 3 aña di mei a pasa y te dia di awe no a cumpli cu ni un di e condicionnan stipula pa Gobierno anterior y teniendo na cuenta tur e corespondencia cu ta na BID of cu ta den filenan di Gobierno, dia 7 di december 2009 Gobierno nobo a manda un carta pa e grupo di Trusam bisando cu nan no a cumpli cu ningun di e requisitonan.

“Awe faltando mas o menos dos siman pa Gabinete Mike Eman por a haya un solucion pa Bushiri Hotel, cu lo duna oportunidad di trabao na un cantidad di hende, cu lo kita e bista di e ruina cu nos tin para eynan pa mas cu 5 aña caba y cu lo papia di un inversion di mas di 270 miyon Dollar den un hotel 5 strea di cadena Hilton, ta bin cu un beslag riba Bushiri.

Esaki despues cu Sr. Briesen ta duna un declaracion siman pasa…ora bo lesa loke tin poni den e carta di abogado, bo ta puntra bo mes ta ken a yuda traha e carta aki, of ta kennan hunto a compila e carta aki pa manda pa perhudica Gobierno di Aruba”, Minister Otmar Oduber a duna di conoce.

E grupo a haya un carta dia 7 di december 2009 for di Gobierno cu ta bisa cu nan no a cumpli cu nada, normalmente ta duna 30 dia y hasta 60 dia pa warda un reaccion, pero no ta bisa nada. Te na fin di mei a manda un carta caminda ta pone algun cos cu absolutamente no ta berdad y cual a worde contesta e mesun dia atraves di abogado di Gobierno.

Den e carta ricibi door di Gobierno ta pone cu tabatin un abogado cu a acerca Gobierno pa dunanan un contesta, esaki ta algo cu Minister Oduber ta nenga rotundamente. Tambe nan ta bisa cu tin hende cu a bin cerca Gobierno wardando respuesta pa reunionnan cu mester a tuma lugar, esaki tampoco ta berdad.

 Ta menciona nomber di Sr. Mendizabal, siendo cu Minister Otmar Oduber mes a papia telefonicamente cune caminda el a notifica e minister cu e cadena hotelero no tin interes di sigui traha cu e grupo di Trusam.

Ningun momento Minister Oduber a ricibi un yamada di Fresnos/Trusam, nunca nan a pidi un reunion cune y ta logico pa pensa si un grupo ta serio cu un proyecto manera esaki di miyones, promer cos cu a haci ta bati na porta di minister, conversa y mustra e interes un biaha mas.
Pero contrario na esey, dos luna a pasa y nan no a reacciona, anto awe, dos siman promer cu a firma e acuerdo cu Hilton, atraves di Baron Investment, cu si a pone ya caba un garantia di 2.6 miyon Dollar, a bin cu e claim aki.

Minister Otmar Oduber ta considera e acto aki como uno condenabel, lamentable y mas cu tur e ta kere cu e ta un cuchiu den lomba di comunidad Arubano.

El a bisa claramente si cu lo bringa esaki, lo bay corte pa elimina mas pronto cu ta posibel e beslag riba e propiedad, pasobra ta ki beslag por pone riba un propiedad cu ta di pueblo di Aruba sin cu a paga ni un cent preto pe.

“Awe bo kier perhudica un pais di haya un proyecto asina beneficioso, pasobra bo tin un agenda politico scondi tras di dje, of un agenda financiero caminda tin hendenan lo kier bay cobra for di e asunto aki”.

- Advertisement -

DUNA COMENTARIO

Please enter your comment!
Please enter your name here