Brazil Taekwondo Stichting a tene su di cuater Club Kampioenschappen.
ORANJESTAD (AAN) – Diaranzon ultimo Brazil Taekwondo Stichting a tene su di cuater Club Kampioenschappen. Tur fin di luna e miembronan di Brazil ta reta otro den e Club Kampioenschappen y tur luna tambe tin sorpresa entre e miembronan. E biaha aki Nigel Geerman a sorpresa su contricantenan. Nigel Geerman a bin brabo a luna aki, awor cu skop pa cabez ta na vigor entre e chikitonan, ta esaki so nan kier haci pa asina haya nan tres punto di avese. Nigel Geerman kende normalmente sa perde su peleanan a bin ta haci un cos y ta gana tur dos su peleanan. Nigel Geerman a topa cu Mark Giel kende ta un di nos fiel miembronan y a bin ta score den e prome rond cu un solo skop, na unda cu e la bay dilanti cu 3 punto.
Mark a purba di score bek, pero Nigel Geerman a keda ariba su contra atake no dunando Mark ningun chens pa score. Den e di dos rond tur cos a keda mescos na unda cu Nigel Geerman a gana cu un score di 3-0 contra di Mark Giel.
Awor cu Mark Giel a perde for di Nigel e tin trabou pa haci den espera di otro luna. E di dos pelea di Nigel Geerman e la bin ta topa Rasheed Lowe, kende no sa kico ta significa para, pero e biaha aki un otro gay a canta.
Den e prome rond Nigel tabata sa bon con pa score cu tolleo, (skop pa pecho) na unda cu e la ranca cu 1 punto dilanti. No a pasa mucho cu Nigel a bolbe score cu un tolleo lagando Rasheed atras cu 2 punto.
E rond aki tambe a termina cu 2-0 pa Nigel, coach Clifford Rasmijn a papia cu Rasheed pa splike cu e tin cu ataca mas. Den e di dos rond Rasheed a ataca Nigel, pero Nigel tabata tin e skop wardando pa Rasheed na unda cu e la score un pa cabez haciendo e score cu 3 punto mas. Di akinan e pelea a bira pushi y raton.
Ni kico Rasheed a haci Nigel tabata tin su bloknan bon poni y e score a caba 5-0 pa Nigel Geerman. E otro pelea hopi interesante tabata e pelea entre Marwin Lont contra di Rai-Anne Dabian. Rai-Anne a sali den e promer rond cu un solo skop pa cabez, na unda cu Marwin a keda pensa so.
E no a spera cu un dama por skop e pa cabez, wel Rai-Anne a mustra cu e ta manda. No a dura mucho tempo unda cu Ria-Anne a bolbe lansa un otro skop pa cabez contra di Marwin. Aki Marwin a cuminsa puntra su mes, si esaki ta e mes cu ta hayando skop for di un dama. Marwin a cuminsa busca punto bek cu tollyo na unda cu e la score 2 punto.
E promer rond a termina 6-2 pa Rai-Anne. Aki Rai-Anne tabata hopi contento. Den di dos rond Marwin a bin ta busca punto, pa asina purba di gana for di Rai-Anne na unda cu esaki tabata e caso. Marwin a bin ta score cu tolleo cada biaha cu Rai-Anne a laga su bloknan cay. Marwin a bin ta empata e di dos rond.
E rond a termina 6-6. Aki mester a bay den sudden death. Esun cu score prome ta gana, wel Marwin a busca su punto y a gana tambe for di Rai-Anne.
Despues di e victoria ariba Rai-Anne, Marwin a bin topa Jeffrey rasmijn, kende no tabata niun contest pe. Marwin a bin ta lastrando Jeffrey cu un score di 20-1. Aki por mira hopi cla cu luna pasa tabata tin otro ganadornan y awor cos a cambia.
Na tur nos Club Kampioenschappen ta ser usa e sistema electronico Daedo. Nos ultimo Club kampioenschap ta bay ta dia 29 di November pa e anja aki. Cada luna lo suma e puntonan pa asina wak kende lo ta e ganador maximo na fin di anja. Aki bounan ta e resultadonan di e 4 Club Kampioenschap
Nigel Geerman vs Mark Giel 3-0
Marwin Lont vs Jeffrey Rasmijn 20-1
Jendrique Gumbs vs Hakeem Lowe 3-0
Jeffrey Rasmijn vs David Lont 9-5
Nigel Geerman vs Rasheed Lowe 5-0
Marwin Lont vs Rai-Anne Dabian 7-6
Hakeem Lowe vs Jendrique Gumbs 5-0
Brazil Taekwondo Stichting ta felicita tur e ganadornan di e luna aki. Tambe nos kier a recorda tur hende cu nos car wash pa recauda fondo ta dia 7 di November 2010, na Centro di Bario Brazil pa asina nos por bay Surinam otro aña April cu nos miembronan.
