Home General Docentenan y personal di Colegio Arubano cu accion di protesta, como prome...

Docentenan y personal di Colegio Arubano cu accion di protesta, como prome stap!

10
0
SHARE
- Advertisement -

colegio1Nan no kier un rector externo!!
ORANJESTAD (AAN) — DIARIO a entrevista e docentenan di Colegio Arubano, señor Withney Kock y sr. Jossy Tromp (Rector Interino), relaciona cu un accion di protesta, cu e cuerpo di docente y personal di Colegio, a tene ayera mainta. Sr. Kock a bisa cu den pasado e directiva a duna su impresion cu nan kier nombra un rector externo pa Colegio, y tanto e docentenan como e “school leiding” ta contra e decision aki, y nan a argumenta esaki. “ El a sali na diferente media y e problema cu nos ta sinta awe cune ta cu ya ta bira seis luna cu nos no tin un rector. Nos rector interino a tuma su retiro y nos tin un guia di school cu ta trahando riba mitad forza.

Nan kier pa nos cana, pero nos ta canando riba un pia y asina nos no ta yega leu. Nos a reuni ayera y tin diferente punto di accion cu nos kier haci, pero aworaki importante ta cu nos Rectorado wordo reforza mas pronto posible”, docente sr. Withney Kock a subraya.

E docente a declara cu e ta sigur cu den Colegio tin hende completamente capacita pa asumi e cargo di Rector. Tin 230 docente cu cada un por haci e trabao concerni, pero importante ta, el a subraya, cu tin docente cu tin añanan caba den e funcion di director interino, cu mas cu diez aña di experiencia.

“ Ningun hende por bin bisa mi cu tin hende cu mas experiencia cu e docentenan aki con pa maneha e school aki di paden te pafo y cu sa e cultura cu nos tin na e pais aki”, docente sr. Kock a remarca.

El a agrega cu nan tabata tin un encuentro cu SMOA, unda nan a yega di bisa kico nan ta pensa, y cu tur e palabranan cu nan a papia a laga sa cu nan no ta bay cambia di opinion. “ Nan tin nan mente fiha cu un rector externo mester bin y cu esey mester pasa.

Esaki ta e motibonan cu nos ultimo director interino a bisa cu nos por sinta na mesa conversa, pero nan a bisa no. Cu nos por papia, pero esaki ta nan plan y cune nan ta bay door”, Kock a reitera.

E prome stap di accion tabata esun di ayera mainta, y e siguiente ta pone e bala un bez mas den scochi di e directiva, bisa nan cu nan kier mas pronto posible un solucion, y despues di vacacion nan lo re-evalua e contesta cu nan lo haya di e directiva, y segun esaki nan lo tuma mas accion. E cuerpo di docente ta dicidi riba esey caba.

E accion di protesta di diahuebs awor tabata uno improvisa, segun e docente, algo cu a ser dicidi diaranzon cu a pasa pasobra nan no por mas cu e problema, y e siguiente paso ta evalua esaki despues di nan siguiente reunion, ora vacacion caba.

Docente Kock a splica tambe cu tin un lista di hende externo cu a solicita pa e cargo di Rector di Colegio, y nan a wordo invita pa bin wak e curriculum vitae di e solicitantenan, pero cuerpo di docente ya caba a duna un señal y mayoria a vota pa no acepta un rector externo. Pesey, nan no ta haya ta na su lugar pa bay sinta wak CV y carta di candidatonan di pafo di Colegio, pasobra nan no kier esey.

Tin indicacion cu e intencion di e directiva di SMOA ta pa drecha e resultadonan di e studiantenan, y riba e pregunta aki na sr. Kock, el a bisa cu nan mester acerca e docentenan y ban hunto cu nan schouder cu schouder, pasobra e problema cu tin ningun ta core pa nan, nan sa kico nan ta, y ta para cu nan banda di esaki.

“ Nos no a nenga e problemanan pero nos kier pa e directiva comparti cu nos, pa sinta na mesa y bin cu solucion. No tuma un decision impone riba nos y bisa cu esaki nos mester guli manda abao”, docente Withney Kock a acentua.

- Advertisement -

DUNA COMENTARIO

Please enter your comment!
Please enter your name here