ORANJESTAD (AAN): Diamars DIARIO durante un encuentro a entrevista fiscal nobo na Aruba mr. Vreneli Vreeling, kende tin apenas 3 siman na Aruba. Prome cu el a bin Aruba el a traha na Den Bosch pa 3 aña y mey. Prome cu esey el a haci e opleiding di RAIO. Awor e ta bezig ta ser conoci cu tur hende cu e mester conoce, el a bishita edificio di corte na diferente occasion y tambe wardanan di polis.DIARIO a puntra sra Vreeling con e proceso a bay pa e por a bin traha na Aruba. El a splica cu tabata tin algun vacatura y eseynan ta worde publica. El a reacciona riba esaki, el a worde entrevista y asina el a logra haya e puesto pa bin Aruba.
Segun e fiscal, desde cu el a yega Aruba, a parti e carteranan di e fiscalnan pa determina den ki seccion nan ta bay ta activo. Sra Vreeling lo atende cu Landsrecherche y BIZO, mientras cu su distrito ta bay ta Santa Cruz.
El a bishita Santa Cruz caba diferente biaha y BIZO tambe. E fiscal a bay KIA tambe pa wak con tur cos ta hinca den otro y tambe na Warda di Polis di playa. Mr. En total Mr. Vreeling mescos cu e otro fiscal nobo, lo keda traha na Aruba pa 3 aña.
Antes tabata asina cu despues di e 3 añanan e fiscal por a pidi pa un prolongacion, pero esey a cambia awor. Despues di 3 aña e tin cu bay back Hulanda. DIARIO a puntra e fiscal con ta pa laga su famia atras.
El a splica cu afortunadamente su casa y su cacho a bin Aruba cune, pero e ultimo dos simannan prome cu el a bin Aruba tabata simannan fastioso pasobra e mester a cuminza despedi di su famia y amigonan.
Segun e fiscal, asina el a descubri cu e no ta gusta tuma despedida. DIARIO a puntra e fiscal si tin un caso na Hulanda cu e tabata parti di dje cu pa un of otro motibo a keda den su mente.
El a bisa cu un caso cu a haci un impresion riba dje tabata un caso den cual un homber na Zoetermeer a tuma bida di su casa y yiunan.
“Den tur aspecto e caso aki tabata grandi y el a impactami”, segun mr. Vreeling. DIARIO a puntra e fiscal kico e ta spera di Aruba. El a bisa cu e intencion ta pa bin cu cierto mehoracionnan den cierto parti di e maneho.
Si cosnan por bira mihor, mester wak si por logra esaki. El a bisa cu e ta pensa cu e mes lo bay siña hopi den esaki. Segun mr. Vleeling, e ta kere cu na Aruba e ta bay tin mas contacto internacional, compara cu unda e tabata traha na Hulanda. El a bisa cu for di esaki tambe e lo siña hopi y e ta contento cu esey.
